GTE: Isornartorsiuineq tunngavissaqanngilaq
Kulusuulli Tasiilallu akornanni qulimiguulimmik angallassisartoq, Air Greenland, ippassaq unnukkut akissuteqarpoq, oqarluni, tamanna ilumuunngitsoq, Namminersortunummi isumaqatigiissut naapertorlugu qulimiguulik tassanilu inuttat tamaani angallassinissamut pisussaaffeqarlutik angalasarmata.
Miké Nicolaisen aamma isumaqarpoq, Tunumi tuniniaanissamik pilerisaarinermut ingerlatsinissamut Nunatsinni Takornariaqarnermi Inuussutissarsiornermilu Siunnersuisoqatigiit aningaasanik immikkoortitsisassasut, imaluunniit Kulusuup Tasiilallu akornanni qulimiguulimmik timmisartuussisarnerup pitsaanerulernissaa anguniarlugu Air Greenland aningaasaliiffigisalertariaqaraat.
Nunatsinni Takornariaqarnermi Inuussutissarsiornermilu Siunnersuisoqatigiinni, GTE-mi, pisortaq, Thomas Rosenkrands akissuteqarluni oqarpoq, Kalaallit Nunaat tamaat GTE-p tuniniaassukkaa, soorunalumi aamma Tunu. Tassanilu aamma Air Iceland Icelandairilu takornariaqarnermi qitiusumik suleqataalluinnartut. Angalatitsiviilliuku aalajangiisartut takornariat sumukassanersut, Thomas Rosenkrands oqarpoq.
Thomas Rosenkrandsip erseqqissaatigaa Air Greenlandip qulimiguulimmik timmisartuussisarnerata tapiiffigineqartarnissaa Namminersortut timmisartuutileqatigiiffiullu akornanni eqqartorneqartariaqartoq.
