GSS-mi aqutsisoq aqqanilissaa pissartanngoreerlutik: Pitsanngoriaqqinnissaq kaammattuutigisarparput
GSSip assammik arsartartuisa nersortarialimmik 2010-miit tulleriiginnarnik pissartanngoqattaarnerani oqaluttuaq nutaamik ilavoq.
Tassami peqatigiiffiup taassuma angutitai arnartaalu tamarmik pissartanngorniunnerit aqqanillit tulleriisillugit pissartanngorput. Nunatsinni assammik arsartarnermi tamanna rekordiuvoq.
Finalemi GSS-ip angutitaasa unammisaat NÛK muminnissaq sioqqullugu arlaleriarlutik siuartaraluarput taamaattorli dommerit naggataamik siggarmata 24-32-mik ajorsarlutik.
1. GSS, Nuuk
2. NÛK, Nuuk
3. Aqissiaq, Maniitsoq
4. Nagdlúnguak, Ilulissat
5. Norsaq HC, Aasiaat
6. Akuleriit, forskellige byer
Ukiut iligiivi:
Aquttoq: Inuk Højgaard, GSS
Isuani saamerleq: Lars Ole Lyberth, GSS
Qeqqani agguaasoq: Nuka Bilo Heilmann, GSS
Tunuani saamerleq: Marco Geisler, GSS
Tunuani talerperleq: Akutaaneq Kreutzmann, Aqissiaq
Isuani talerperleq: Lars Møller, Nagdlúnguak
Titarnermiittoq: Carlo Lyberth, NÛK
Neriunaateqarluartoq: Malik Rosing, Aqissiaq
Akiuulluarnerpaaq: Carlo Lyberth, NÛK
Assersuillammak: Marco Geisler, GSS
Iliminut naleqarnerpaaq: Akutaaneq Kreutzmann, Aqissiaq
Ukiut tulleriisillugit pissartanngoqattaarnermi suli angusaqarusussuseq GSS-meersut pigivaat.
- Ukiut qulit tulleriisillugit pissartaasareeraluarluta pitsanngoriaqqissinnaaneq pingaarnerutittuaannarparput ajugaanissaq salliutinngikkaluarlugu, ujaminnatsitsineq naammasseriitsiartoq GSS-mi aqutsisuullunilu sungiusaasoq Nuka Bilo Heilmann KNR-mut oqarpoq.
Nuup illoqarfiani ukiormanna pissartanngorniuttoqarnerani NÛKp angutitai ataasiarlutik GSS-mut ajugaapput. Taamaattumik KNR-miit apeqqutigineqarpoq GM-ip tungaanut sungiusarnermi tamanna sukasaataasimanersoq.
- Kikkut unammisussaanerlugit eqqarsaatigivallaarneq ajorparput. Eqqarsaatiginerusarparput sungiusarnermi tamaviaarluta sapinngisarput tamaat ilungersornissarput, Nuka Bilo Heilmann oqarpoq.
Bronzenniunnermi Aqissiaq Maniitsumeersoq Nagdlúnguamut Ilulissaneersumut ajugaavoq. Finalemut anngunnissamut Aqissiaq isertitaq ataaseq amigaatigiinnaraluarpaa aalajangiisumik arfininngornermi unammisoqarnerani, tassanilu Aqissuaq Nagdlúnguamut målimik ataatsimik ajorsarpoq naligiiginnarneq finalemut anngussutigisinnaagaluarlugu.
Iliminut naleqarnerpaatut Akutaaneq Kreutzmann Aqissiameersoq toqqarneqarpoq.
