Grønlandsbanken: Suliffissaasinnaasunik ujartuisoqartariaqarpoq
Aningaaserivillu isumaqarpoq periarfissat taakkua akulloqqunneqarsinnaanngitsut. Tassa annertuumik ingerlatsisoqalersinnaavoq sukkasuumik ineriartitsisumik imaluunniit arriitsumik siuariartorujoortoqarsinnaavoq. Taamaammat aningaasaqarnikkut sukaterinertalimmik aqutsisoqarnissaa saneqqunneqarsinnaanngilaq - Namminersorlutik Oqartussat komunillu aningaasaqarnerat eqqarsaatigalugu. Pisortatigoortumik aamma akiitsorineqartut ersarissumik naatsorsorneqarnissaat pisariaqarluinnarpoq - Toqqaannartumik toqqaannanngikkaluamillu qularnaveeqqusiisimanerit amerlaqisut ilanngullugit.
Taakkua saniatigut Grønlandsbankimiit tikkuarneqarpoq, akileraartarnerup inuulluarnissallu tungaatigut kiisalu angalaniarluni periarfissat eqqarsaatigalugit nutarterutiginiakkat sukkasuumik, siunniussallu saneqqutaarnagit anguniarneqartariaqartut. Sulilu taakkua saniatigut aningaaseriviup politikerit kaammattorpai, inatsisiliamik allaffissornikkut pisariitsuunissaasigut allaffissornikkut annertusaanaveersaaqqullugit. Taavalu tunisassiorniarneq taama annikitsigitillugu unammillersinnaanerput pitsanngorsassagutsigu aningaasarsiat qaffannaveersaartikkaanni aamma iluassaqisoq Grønlandsbanki allappoq.
Tamakkuali eqqaareerlugit ilinniartitaanerit qaffassartuarnissaat, suliffiusinnaasut inuillu namminneq suliffeqarfinnik pilersitsisut amerlisarnissaat kiisalu namminersorlutik inuussutissarsiortut amerlisinnissaat aningaaseriviup eqqumaffigineqartariaqarnerarpai.
Tamakkualu anguniassagaanni ilinniagaqartut amerlisartariaqarput. Sulisinnaasut 40 procentii kisimik piginnaalersitsissutaasumik ullumikkut ilinniagaqarnikuupput. Inuiaqatigiit ilinniarluarsimasut siunissamut isumannaallisaataasussaapput...inunnut ataasiakkaanut inuiaqatigiinnullu. Taamatummi tunisassiornermik, suliffissaqartitsinermik iluanaaruteqarnernillu annertusaasoqarsinnaammat. Kalaallit Nunaanni aningaasaqarniarnerup pitsaasumik ingerlalernissaanut nukiit suli iluaqutigineqanngitsut qaffasinnerusumik ilinniartitaanermiipput, Grønlandsbanki ukiumoortumik nalunaarusiamini ilaatigut taamatut allappoq.
