GrønlandsBANKEN meeqqanut inuusuttunullu kræftimik napparsimasunut tunissuteqartoq
Grønlandsbankenip Juullimut tunissutaa meeqqanut inuusuttunullu kræftimik napparsimasunut ukioq manna tunissutigineqassaaq.
Juliane D. Berthelsen Johanne Olsenilu, Neriuffiup Kattuffiata meeqqanut aningaasaateqarfia sinnerlugu tigusiartorput, tunissutigineqartullu nuannaarutigaat:
- Aningaasat Kalaallit Nunaanni meeqqanut inuusuttunullu nappaassuarmik eqqugaasimasunut piffissami artornartumi qiimmassaatissatut agguaanniarparput, Juliana Berthelsen Johanne Olsenilu oqarput.
Aningaasat sumut ingerlatinneqassanersut, Grønlandsbankenimi sulisut aalajangigarivaat:
- Kalaallit Nunaanni tamarmiusumi tamanut Aningaaseriviugatta, nuna suliffeqarfeqarfigisarput tapersersorparput. Juullimut inuulluaqqutissatut naqitertitassaagaluit sipaarutiginerisigut, Nunatsinni innuttaaqatigut nukarliunerusut piffissami oqimaatsumi qiimmassaasissallugit immikkut iliuuseqarfigisinnaalerpagut. Qularutiginngilarput taama iliorneq sullissatta niuernermilu attavigisattaallaffigineqarnermit nuannarinerussagaat, aningaaseriviup Nuummi pisortaata tullia Yvonne Kyed oqarpoq.
Aningaaseriviup juullimut pilluaqqussummik naqitertitsinani taarsiullugu ikiuiniarluni tunissuteqarfigisaa ukioq manna ukiut sisamaraat. Nuummi angerlarsimaffeqanngitsut unnuisarfiat siorna tunineqarpoq, Meeqqallu Inuunerissut 2013-imi tunineqarlutik.