Grønlandsbanken EU-mit misissorneqarnissaminut piareersimavoq

Europami aningaaseriviit aningaasaqarnerup ajalusoorneranit qanoq sunnertiatiginerinik misissuinerit - stresstestimik taasat inerneri juulip qaammataani saqqummiutissavaat. Aningaaserivinni aningaasaliisartut sullitallu aamma takusalissavaat nunami aningaasaqarneq ajornartorsiorfiulerpat aningaaserivik ajornartorsiulissanersoq.

Danmarkimi aningaaseriviit nalunaarusiami peqataatinneqarput.

GrønlandsBankeni aamma Københavnimi aningaasanik niuerfimmi nalunaarsorneqarsimasuuvoq. Nunatsinnili aningaaserivik EU-p nalunaarusiaani peqataatinneqarnersoq Grønlandsbankenip pisortaanerata Martin Kviesgaardip suli naluaa.

- Neriuppugut aningaaseriviit misissorneqarneranni peqataasinnaassalluta, Martin Kviesgaard KNR-imut oqarpoq.

Aningaaseriviit aningaasarsiornerisa nunami namminermi aningaasatigut ajornartorsiortoqalerpat qanoq sunnigaatigisinnaassusiannik misissuinerup takutissavaa, aningaaseriviit qanoq ajutoornissaminnut upalungaarsimatiginersut.

Assersuutigalugu inissiat akii apparujussuarpata, suliffissaaleqisut amerlerujussuarpata Kalaallit Nunaataluunniit aningaasaqarnera ajutoorluinnassagaluarpat qanoq aningaaseriviit iliussappat. Annassappat ajutuussappalluunniit.

Nationalbanki Finanstilsynilu - tassa Naalagaaffiup aningaaserivissua aamma Aningaaserivinnik nakkutilliisut ataavartumik aningaaseriviit misissuiffigisarpaat, taakkununnga Grønlandsbanken ilaalluni. Paasisalli allanut ingerlateqqinneqarneq ajorput. Nutaatut iliuusissaq tassaavoq EU-p maanna misissuinerit tamanut saqqummiunnialermagit.

- Uagut misissuinerit tikilluaqquavut, tamanullu saqqummiunneqarnissaat ajoriffissaqartinnagu, Martin Kvies Kviesgaard.

- Uagummi aningaaserivimmi nammineq aningaasaqassuserput, nunamilu aningaasarsiornerit qanoq ingerlanersut nalilersortuarpavut, Naalagaaffiup aningaaserivissuata, aningaaserivinnillu nakkutilliisut misissuinerisa saniatigut, pisortaaneq oqarpoq.