"Grønlands heldige kartoffel" ajugaavoq
Inuusuttut issittumi misissuinertigut paasisaminnik, tamanut paasiuminartumik saqqummiussinissamut kajumissaarniarlugit nersornaasiinermik unammisitsinermi siunertarineqarpoq.
Nersornaasiinissamut unammisitsinermi ajugaavoq Liv Mejer Larsen, allaaserisani taaguusikkani "Grønlands heldige kartoffel", naatsiianik naatitsinerup iluatsinnerannut tunngasoq, 10.000 koruuninik nersornaatisissutigaa.
Naatsiiat Nunatsinni naatinneqartartut qanoq pitsaatiginerannik tiguartinnartumik allaaserineqarnerat, matumani ilanngullugit nappaatigilersinnaasaat aamma nunarsuatsinni silap kiatsikkaluttuinnarnera, naliliisunit nersualaarneqaqaat.
Aviaaja Lyberth Hauptmann aamma Marie Lenander Petersen normu 2-tut normu 3-tullu 2.000 koruuninik nersornaatisipput.
Aviaaja Lyberth Hauptmannip Arsuup eqqaani kangerlummi Ikkami sukaasat allaaserai. Marie Lenander Petersenillu soqqaat oqaluttuarisaanermilu plastikkit nassaarineqarnissaat ukiut hunnorujulikkaat sioqqullugit, plastikitupajaaq naggueqatigiinnit Inunnit atorneqartarsimanerat allaaserai.
Nersornaatit Academicus Arcticus-it Københavnimi Issittumut Ilisimatusarfimmi tunniunneqarput, allaaserisallu piffissami ungasinngitsumi aviisimi Sermitsiami atuagassiamilu Tidsskriftet Grønlandimi saqqummiunneqassapput, taakkumi Royal Arctic Line peqatigalugu nersornaammut nutaamut aningaasaliisuugamik.
