Greenpeacep Shellimut akerliussutsimik takutitsineri politikkikkut qisuariarfigineqarput

- Uuliasiorluni qillernernut tunngatillugu isumannaallisaaneq sumiiffinnut allanut naleqqiullugu pitsaanerusariaqarpoq, Issittumimi pissutsit allaanerulluinnarput. Akerliussutsimik takutitsisoqarnera Shellip eqqarsarluarnissaminut atortariaqarpaa. Folketingip Nunanut allanut tunngasunut ataatsimiititaliaata siulittaasortaavata, Mette Gjerskovip Socialdemokratineersup, Greenpeacep Shellip Fredericiami akuiaavianik ippassaq ulloq naallugu tiguaanerata kingorna mianersoqqusinera taama ersaritsigaaq. Aviisi MetroXpress ullumi taama allappoq.

Akerliussutsimik takutitsisut, ilaatigut nannutut atisalersorsimasut, allagartarsuarmik meterinik 23-nik takitigisumik nivinngaapput, 'Save The Arctic'-imik (Issittoq annaatsigu)oqaasertalimmik. Greenpeace Shellip Issittumi uuliasiornissaanut akerlilerniarlugu takutitsipput.

- Issittumi qillernerit ajornartorsiutaanerat tamatta eqqarsaatigilluarlugillu nakkutigilluartariaqarpagut, uuliakoortoqassappammi tamanna uumasunut inunnullu ajoqusiisussaassaaq, Mette Gjerskov MetroXpressimut oqarpoq.

Aamma Margrete Auken SF-imeersoq, EU-parlamentip ilaasortaanut qorsunnut ilaasortaasoq, Issittumi Siunnersuisooqatigiit peqataanerunissaannik kaammattuivoq, isumannaallisaanerullu annertusarneqarnerata naammannissaa upperinagu:

- Qillerisoqassanngilaq. Uuliasiorluni qillerinermik ilisimannittut uuliasioqatigiiffiitt isumannaallisaalluarnissaminnik oqarnerat upperivissunngilaat, taakku aamma oqaatigaat ajutoortoqarsinnaanersoq apeqqutaanngitsoq, qaquguli ajutoortoqassanersoq apeqqutaaginnassasoq. Taamatullu pisoqassappat saliisussaqanngilaq, Margrete Auken MetroXpressimut oqarpoq.

Kalaallit Nunaanni oqartussaasut mianersoqqusinernik tusaanngitsuusaarnissaat aningaasatigullu isaatitsissutaasinnaasunik taamaallaat eqqarsarnissaat Aukenip ernumassutigaa.

- Kalaallit aningaasaqarnikkut siunissartallit sammisariaqaraluarpaat, qillerineri aningaasatigut iluanaarutissartaqanngillat, aamma Europami qorsuit unitsitsinissaq siunertaralugu ilungersorlutik sulissutigissavaat.