Greenpeacep akiligassinneqarnissani pingaarnerutinngilaa
- 570.000 koruunit suliniaqatigiiffitsinnut aningaasarpassuugaluartut, suliniuteqarnerput aningaasat pissutigalugit iliuuseqarnerunngilaq, pingaaruteqartutulli isigigatsigu taamaaliorpugut. Akiligassiissutigineqartulli akilertariaqassavavut, Jon Burgwald oqarpoq.
Ullormut akiligassiissutigineqartartut aningaasat qanoq amerlatigisut Greenpeacep akilersinnaanerai, taassuma oqaatigisinnaanngilai.
- Neriuppugut Cairn Energy silattuaqilerumaartoq, sillimaniarnermullu pilersaarutini tamanut saqqummiullugu, tamannami Issittumi Siunnersuisoqatigiit najoqqutassiaat naapertorlugu saqqummiunneqartussaavoq, aammami nunani allarpassuarni pilersaarutit taamaattut tamanut saqqummiunneqartarput. Taamaaliorneq silatusaarnerussaaq, tamanna namminneerlutik paasilerumaaraat naatsorsuutigaarput, Jon Burgwald oqarpoq.
Greenpeace qillerivimmut Leiv Eirikssonimut pingajussaannik akerliuniarluni iliuuseqarpoq. Greenpeacermiut katillugit 24-t inatsisinik unioqqutitsillutik qillerivimmut maanna qalloreerput.
- Cairn Energyp sillimanissamut pilersaarutiminik saqqummiussinissaa pingaartorujussuartut isigigatsigu taamaaliorpugut, saqqummiunniarnagumi aalajangiusimaannarmassuk. Taamaattumik Greenpeacep nunani tamalaani pisortaa Kumi Naidoo aalajangerpoq, nammineerluni aamma iliuuseqaqataarusulluni, tassami Greenpeacep massakkut iliuuseqarnera nunarsuatsinni avatangiisinik illersuiniarluni suliniuteqarnerit pingaarnersaasa ilaattut isigigamiuk, Jon Burgwald naggasiivoq.
