Greenpeace russit piumasaaqaat pillugu: Silaaruttutut salliuniarnermut alloriarnerussaaq

Issittup ilarujussuanik piginnittuujumalluni Danmark siorna saqqummiussivoq. Issittup ilaanik annertoorujussuarmik piginnittuujumalluni Rusland maanna saqqummiussivoq - piumasarisaatalu ilaa Danmarkip piumasaqaataata ilaaniippoq.

Taama iliortoqarnera alianartuusoq avatangiisinik illersuiniaqatigiiffimmit Greenpeacemit isumaqarput, taakkumi kissaatiginerugaluarpaat nunat assigiinngitsut Issittup ilaa annertoorujussuaq pigiumallugu iliuuseqassanngitsut.

- Tamanna peqarniunneruvoq piviusumut attuumassuteqanngitsoq, tamatumanimi avatangiisit silallu pissusia eqqarsaatiginngivillugit imminut annerpaamik pissarsisinnaanissaq pineqarpoq, Jon Burgwald Greenpeacemi issittumut akisussaasuusoq oqarpoq.

AAMMA ATUARUK Issittup imartaanik piginnittuulernissamik Rusland piumasaqaateqartoq

Russit ukiuni arlalinni sukumiisumik misissuereerlutik, immap naqqaniittut quassuit Mendelejev aamma Lomonosov  pigisaralugit isumaqartut, nutaarsiassaqartitsiviup Barents Observerip allaaseraa.

Taakku sikuiuitsup ataani immap naqqani annertoorujussuarmiipput.

- Oqaluttuarisaanermit isigalugu nunat arlaannaalluunniit ileqqorissaarnermut atatillugu piginnittuunissaminut pisinnaatitaaffeqanngilaq, piginnittuuniunnermullu sammiveqanngitsumut matumunnga taarsiullugu Qalasersuup kinguaariinni tulliuttuni ataannarsinnaanissaa qulakkeerniartariaqaraluaraat, Bugwald oqarpoq nangillunilu:

- Ruslandip Qalasersuarmik piginnittuujumalluni nalunaaruteqarnerata kingorna Qalasersuarmik piginnittuuniunneq sakkortunerulissaaq, salliuniunnerullu kinguneranik Issittup nakkutigineqarnera maanna amigaateqaqisoq ukiunik qulikkaanik arlalinnik kinguariarfiussaaq, Greenpeacep Issittumut akisussaatitaa oqarpoq.