Greenpeace: Qillerinerit unitsinneqartariaqarput
Uuliamik ujaasilluni misiliilluni qillerinerit marluk ippassigami aallartinneqartut, pinngortitamik illersuiniaqatigiit Greenpeace Nordicip siulittaasuata Mads Flarup Christensen innersuussutigalugit qisuariarpoq.
- Namminersorlutik Oqartussat akuersinerat akisussaassuseqannginneruvoq, Mads Flarup Christensen oqarpoq. Nunat uuliasiortitsinermik misilittagaqarluartut USA, Canada Norge-lu nutaanik uuliasiortitsinissanik akuersisarnitik unitsippaat, Mexicop kangerliumarsuani uuliasiorfiup BP-ip ajutoornerani isumannaallisaanermut tunngasut, ajutoornerullu patsisaa suunersoq paasineqarnissaata tungaanut unititsinerisa nalaani Namminersorlutik Oqartussat akuersissutinik tunioraapput, Mads Flarup Christensen Greenpeace Nordic siuliuttaasuat nutaarsiassaqartitsivimmi Ritzauimit apersorneqarluni taamatut oqarpoq.
- Taamaattumik uuliamik ujaasilluni qillerinerit piaartumik unitsinneqartariaqarput, nutaanillu qillerinissanik akuersissuteqarnissaq Namminersorlutik Oqartussat uniatsittariaqaraat, Mads Flarup Christensen isumaqarpoq.
- Kalaallit Nunaata ilisimasani nassuiartariaqarpaa, Norge-mi Canadami USA-milu ilisimaneqanngitsut pillugit Mads Flarup Christensen oqarpoq.
Uuliasiortitsiviup Cairn Energyp Qeqertarsuup avataani uuliasiornissamut qillerinissanik marlunnik nutaanik qinnuteqaataa, Namminersorlutik Oqartussat tusarniaassutiginiarlugit ippassigami tusarniaaffigineqartussanut nassiuppai.