Greenpeace Danmark immami eqqissisimatitsivinnik pilersitserusunnginnera narrujuummissutigaa
![](/sites/default/files/styles/image_934x467/public/article_images/members-of-greenpeace-take-over-shell-s-headquarters-2.jpg?itok=rH8EYheT)
Danmarkip ministeriunerunera Lars Løkke Rasmussen, nunat avannarliit, Finlandip, Islandip, Norgep Sverigellu naalakkersuinikkut siuttui peqatigalugit USA-p præsidentianik Barack Obamamik ippassaq tallimanngornermi ataatsimeeqateqareersullu Greenpeace taama oqaaseqarpoq.
Danmarkip Afghanistanimi suliniuteqaqataanera Obamap immikkut maluginiarsimallugu ataatsimiinnermi ilaatigut oqaatigaa, soorlu aamma anorisaatinik atuinerulernissamut isumaqatigiissut aamma atsioqatigiissutigineqartoq.
Naallu silap pissusiata allanngoriartornera akiorniarlugu ilaatigut suliniuteqartoqaraluartoq, Greenpeacep pingaartitai tassa Issittumut tunngasut, oqaasinnguamilluunniit taaneqannginnerat Greenpeaccep tusagassiuutinut nalunaarummi apeqquserpaa.
Issittup illersorneqarnerunissaa Barack Obamap ataatsimiinnermi eqqartugassanngortikkaluarpaa, immalli eqqissisimatitanngortitassatut siunnersuutigineqartut Danmarkip akornusersuinera avatangiisinik illersuiniaqatigiiffiup isornartorsiorpaa:
- Allaanngilaq Danmark Norgelu kinguaassatta siunissami assersuutigalugu aalisagaqannginnissaannik suliniuteqarniartut Issittorlu aningaasarsiorfissaannartut isigigaat, avatangiisii soqutiginagit. Uuliasiortitseqatigiit kilisaatillu killeqanngiusattumik iliuuseqarsinnaassasut. Danmark naalagaaffeqatigiittoqarnera pissutigalugu Issittoq pillugu immikkorluinnaq akisussaaffeqarpoq, akisussaaffilli taanna sumiginnarneqarpoq. Danmarki Kalaallit Nunaat peqatigalugu iliuuseqarnissaanut piffissanngorpoq, Birgitte Lesanner, Greenpeacep Danmarkimit oqaaseqartitaa oqarpoq.