Greenland Venture 27 mio. koruunit nalinginut piginneqataassutisisoq
True North Gems Greenland A/S-imi piginneqataassutit 7 procentii suliffeqarfiup Canadami piginnittuanit True North Gemsimit, amerikamiut dollariinik 4 millioninik akilerlugit pisiarai, tassalu 26 millionit koruunit nalinginut. Nunatta rubinisiorfimmik piginneqataassutai taamaalillutik annertuseriangaatsiarput.
Greenland Venture True North Gems Greenlandip 0,58 procentia pigereerpaa, maannalu piginneqatigiiffimmi Aappaluttumi rubineqarfimmi piaasinnaanermut akuersissutilimmi piginneqataassutit 7,5 procentit sinnilaarlugit pigilerlugit.
AAMMA ATUARUK Rubinisiorfik annertunerujussuarmik iluanaarutaasussanngortoq
AAMMA ATUARUK VIDEO Rubinisiornissamut qularinnikkunnaarput
Pisineq eqqarsaatigilluagaasoq
- Kalaallit Aappaluttumi piaanermi sunniutissaat annertusingaatsiarpagut, Greenland Venturep pisortaa Karsten Høy oqarpoq, oqaluttuaraalu pisineq isumaliutigilluagaasimasoq.
- Aningaasat taama amerlatigisut nerriviup qaavanut iligutsigit taava piffissamut ungasinnerusumut isigaluni aningaasaliineruvoq. Rubinisiorfik upperaarput aammalu ingerlatsiviup iluanaarutaalluarnissaa upperalugu, tamannalu peqataaffigerusupparput.
Agguagarsiassat peqataaffigerusullugit aningaasaliisoq
- Aningaasaliivugut agguagarsiassat takkuttalerpata pissarseqataaffigerusukkatsigit. Kalaallit Nunaanni suliniutit amerlanngillat rubinisiorfiup pilersinneqarneratulli suliffissanik taama amerlatigisunik pilersitsereersimasut. Aningaasaliinitta suliffiit taakku qulaakkeerpai siunissamilu suli amerlanerusunik pilersitsinissaq aamma qulakkeerlugu, True North Gems Greenlandimi aammali suleqatini pilersuisuminilu, Karsten Høy taama naggasiivoq.
