VIDEO Rubinisiornissamut qularinnikkunnaarput
Kapisillit Qeqertarsuatsiaanilu aqutsisuni siulittaasoq Jonathan Jakobsen True North Gems Kommuneqarfik Sermersoorlu ataasinngorneq marsip 30-ani ataatsiimeeqatigai.
- Kommuneqarfik Sermersuumi suliffeqarnermut pisortaasup saqqummiussiniarpoq. Silisisarfiunikuusoq, aammalu maannakkut ingerlaqqittussaq, qanoq ilillugu pitsaanerpaamik ingerlatissinnaaneripput. Ilaatigut aamma ujarassiorfimmi sulilerumaartussanik pikkorissaasoqassagami taanna eqqartorniarparput. Ammasarfissai aamma qanoq ililluni ingerlanneqarsinnaanera, Jonathan Jakobsen oqarpoq.
True North Gems Qeqertarsuatsiaani tikilluaqqusaajuaannarnikuunngilaq.
Jonathan Jakobsenip, nammineerluni True North Gemsimut isornartorsiuvigaatsiartarsimasup, innuttaasut peqataajuaannartinneqannginnerannut pissutaatippaa.
Aamma atuaruk Qeqertarsuatsiaaani rubininik piiaavissaq akuerineqarpoq
Rubiinisiorniat, Namminersorlutik Oqartussat, Kommuneqarfik Sermersoorlu inunnik paasititsiniaanerata kingorna nunaqarfimmi inuit qularunnaamisimasut, Jonathan Jakobsenip oqaatigaa.
True North Gems Qeqertarsuatsiaani silisivik ammaqqinniarlugu neriorsuipput. Rubiinisiorfillu ammarpat nunaqarfik aningaasatigut ikiorserneqassaaq.
- Qeqertarsuatsiaamut atugassamik kulturimut tunngasunik aningaasaateqarfimmik pilersitsissapput, ukiut tamaasa ikisivigineqartartussamik, Jonathan Jakobsen oqarpoq.
Piorsarsimassutsimut aningaasaliisarfimmi aningaasat sumut atorneqarnissaat nunaqarfimmi aqutsisunit, True North Gemsimit, Kommuneqarfik Sermersuumit aalisartut piniartullu peqatigiiffiannit isumaqatigiissutigineqassasut, Jonathan Jakobsen nassuiaavoq.
Aamma atuaruk Rubinisiorfissaq piariilerpoq
Taamaattoq aningaasat ilaat sumut atorneqassanersut eqqarsaatigineqareerput.
- Nerisassanik, aalisakkanik nutaanik, neqinik nutaanik aamma tassani pissaqartinnissarput eqqarsaatigaarput. Taavalu minnerunngitsumik tassani kangerlummi nunaminertamik aamma immamik atuineq aamma eqqarsaatigaarput, Jonathan Jakobsen oqarpoq.
