Qeqertarsuatsiaaani rubininik piiaavissaq akuerineqarpoq
Akuersissuteqarnermut allakkiami piiaanissamut matusinissamullu atugassarititaasussat aalajangersarneqarput. Taanna tunisassiornissamut sanaartukkanullu sinaakkutissiivoq. Suliassami ilaasut tamarmik, ilanngullugit sulisunut isumannaallisaaneq peqqinnissarlu, avatangiisinik allanngutsaaliuineq, suliassami attaveqarnermik pilersitsinerit allarpassuillu ilaatinneqassasut, Inuussutissarsiornermut Aatsitassanullu Naalakkersuisoq Jens-Erik Kirkegaard tusagassiuutinut nalunaarummini ualimut allappoq.
Jens-Erik Kirkegaard ima oqarpoq:
- Suliniut aallartinneqalermat nuannaarutigeqaara tamannalu Kalaallit Nunaannut suliffissanik nutaanik, inuussutissarsiutitigut periarfissanik aamma isertitassanik neriunaateqarluarpoq.
Kommuneqarfik Sermersuumi Borgmesteri Asii Chemnitz Narup, kommunemi suliffissanut nutaanut aamma iluarisimaarinnippoq:
- TNG najukkami sulisunik sulisoqarnissaminut pisussaaffeqarpoq. Tamanna kommunitsinnut iluaqutaassaaq minnerunngitsumik Qeqertarsuatsiaarmiunut, borgmesteri oqarpoq.
Ullumi akuersissuteqartoqarnera True North Gems-imit aamma nuannaarutigineqarpoq:
- Tunisassiornissamut sanaartornissamullu akuersissuteqartoqarnera TNG-ip iluarisimaarpaa, suliassarmi ingerlateqqinneqarsinnaalermat. Sanaartornermut immikkoortumi aallartinnissarput qilanaaraarput, taamaalilluni sapinngisamik sukkanerpaamik tunisassiornerpiaq aallartissinnaaniassagatsigu, Nick Houghton, TNG-mut pisortaaneq nuannaarluni taama oqarpoq.
