Greenland Properties tunitsivinnik ammaalerpoq
-Tassa ullumikkorpiaq nalunaarutigivaat, tunisassiorsinnaanerminnut akuersissutit aaqqiivigineqariarpata ammaariaannallutik, Aalisarnermut Piniarnermut Nunalerinermullu Naalakkersuisoqarfimmi pisortap tullia Jørgen Isak Olsen oqarpoq.
Greenland Properties aasaru juunip tungaanut ammatitsinermini Namminersorlutik Oqartussanit tapiiffigineqartariaqarani ingerlanneqassaaq.
-Maannakkut taanna siunertaanngilaq. Una piffissaq nipisanniarnernup nalaani namminneq ingerlasinnaallutik nalunaaruteqareernikuupput. Periarfissarivaat qinnuteqarniarunik qinnuteqassallutik, kisianni tassa naalakkersuisut nutaat taanna alajangersaavigisariaqarpaat, Jørgen Isak Olsen oqarpoq.
Ikamiuni, Attumi, Napasumi Maniitsumilu tunitsiviit ingerlanneqassasut Namminersorlutik oqartussanit naatsorsuutigineqarpoq.
-Nalunaaruteqarniarput sumi qaqugukkut ammaaniarlutik sunillu ammaaniarnerlutik, tamanna neriorsuutigivaat sapaatip akunnerata tulliani tamakkiisumik nalunaarutiginiarlugu, kisianni tassa maannakkumut ammarsinnaasaminni ammaaniarlutik nalunaassapput, Jørgen Isak Olsen oqarpoq.
Nipisanniarnerup nalaanni sineriammi sumiiffinni assigiinngitsuni arnarlunniarfiusartuni tunitsiveqarnissaq qulakkeerneqartoq Namminersorlutik Oqartussanit aamma ilisimatitsissutigineqarpoq.
