Greenland Oil Spill Response ataatsimeersuarpoq
Ingerlatsiviup ilanngaatigineqartussat ilanngaateereerlugit kaaviaartitaat 2015-imi taamaalillutik 4,6 millionit koruunit missaaniipput, tamannalu akileraarutip akilerneqarnerisa kingorna 114.000 koruunit missaannik amigartooruteqarpoq , ukiup siuliani 229.000 koruunit missaannik amigartooruteqarsimalluni.
Ingerlatsiviup amigartoorutai ukiup siulianut sanilliullugit affaannanngorput. Taamaattumillu ukioq taanna pigisat nalillit ilanngukkaanni angusat aqutsisunit ’naammaginartutut’ nalilerneqarput.
Ingerlatsiviup ukiumoortumik ataatsimeersuarnerani siulersuisut qinerneqaqqipput, tassaapput Steen Ove Hansen, Oddbjørg Varhaug Greiner aamma Hanne Berthels.
Ingerlatsivik Greenland Oil Spill Response 100 procentimik Namminersorlutik Oqartussanit pigineqarpoq uuliakoornikkut mingutsitsinissamut upalungaarsimaneq aamma uuliakoornikkut mingutsitsinissamik akiuiniarneq kiisalu uuliakoornerup kingorna avatangiisini saliineq pillugit suliaqarnermik aammalu pingaartumik Kalaallit Nunaanni aatsitassanut suliassaqarfiup iluani taakkununnga assigusunik suliaqarnermik ingerlatsilluni.
Ilinniarnernik nunat tamalaat akornanni pitsaasusermut naleqquttumik 2015-mi aallartitsisoqarpoq, pilersaarutillu malillugit Nuummi Aasiannilu uuliamik mingutsitsoqassagaluarpat sulisussanik 16-inik ilinniartitsisoqassaaq, atortussat tassaniimmata.