Greenland Adventure Race taamaatiinnarneqarpoq

Aaqqissuisut aatsaat siullermeerlutik unamminissamik 2000-imiilli ukiumoortumik pisartumik taamaatitsiinnartariaqarsimapput. Unammineq inuit iligiikkuutaat marlunngorlugit pisarpoq, peqataasunit sermit, kuuit qaputtut, qaqqat sivinngarissut allunaasatigut majuarfigalugit, nuna ingerlavigiuminaatsoq cykelerfigalugu ilulissallu akorni qajartorfigalugit ingerlanneqartarluni. Aaqqissuisut neriuutigisimagaluarpaat ulluni tallimani ingerlaarnissami ikinnerpaamik iligiikkuutaat quliussasut.

- Ukioq manna marlussuinnaat unamminissamut nalunaarsimapput, ilimagineqarluarlunilu peqataasut iligiikkuutaat tallimaassasut, taakkuali unamminissap ingerlannissaanut suli ikippallaarput, taama oqarpoq Poul Jørgensen Greenland Adventure Racemi siulersuisunut siulittaasoq.

- Nutaatut aammattaaq qallunaat timersoqatigiiffiisa akornanni nittarsaassinissamik suliniuteqarneq ilanngukkaluarparput, iluatsitsinatali, Poul Jørgensen oqarpoq.

Taanna isumqarpoq peqataasut ikippallaarnerat angalanermi aningaasartuutit amerlavallaarnerannik pissuteqartoq, nunanit allaninngaannit nunallu sinneraniit.

- Tamatuma saniatigut nunatsinni aningaasaliisut ajornakusoorsimapput, iligiiaat nunatsinneersut aningaasaliisussanik nassaarniarnerat ajornakusoorsimavoq, Poul Jørgensen oqarpoq.

Aaqqissuisut tamatumunnga taarsiullugu Kujataani Leif den Lykkeliges Maraton Qassiarsuup eqqaani ingerlatissallugu aalajangerput. Unammineq Greenland Adventure Racep ullunik tallimanik sivisussuseqartup ilagisussaagaluarpaa, ukioq mannali pisimasutut immikkut ittutut ingerlanneqassalluni.

- Pingaartipparpulli Greenland Adventure Race aappaagu ingerlatissallugu, Poul Jørgensen oqarpoq.