Great Greenlandip akit illersorpai
- Ammit ukiorpassuarni pitsaasuussappata panertumi, nillataartumi taartumilu paarineqartariaqarput, Great Greenlandimi pisortaq Henrik Estrup oqarpoq, nassuiaallunilu ammit pitsaassusii akiilu imminnut ataqatigiittut. Akilli tuniniaasartunut pisisartunullu atuutsinneqartut assigiinngitsutai oqaatigiumanngilai.
- Soorunami uparuartuutigineqartut tusaavagut, pisiniarfiillu amminik paarsilluanngitsut iliuuseqarfigisariaqassavagut. Erseqqissaavigisariaqassavagut ammit qanoq pitsaasuumik toqqortaqarineqassanersut imaluunniit allatut ajornassappat amminik tuniniaaffigisarunnaartariaqassavagut, Great Greenlandimi pisortaq Henrik Estrup oqarpoq.
Great Greenlandip amiutai pitsaasuunatillu akisuallaartut nunatsinni pisisartut ippassaq uparuaapput. Pisisartunit tupigusuutigineqarpoq, nunani allani akitsortserussinerni puisit amii 700-it agguaqatigiisillugit 275 kroneliinnarlugit tunineqartarneri, naak nunatsinni pisiniarfinni akisunerujussuarmik ammit tuniniarneqartartut.
Great Greenlandimili pisortaq akit assigiinnginneri pillugit ima erseqqissaavoq.
- Amminik ataasiakkaanik pisisartut, niuertarfittut arlalinnik pisisartutut akiliillutik pisisinnaanngillat. Suliffeqarfiit inuussutissarsiummik ingerlataqartunik nalunaarsuiffimmi allaqqasut kisimik arlalinnik pisisartutut akiliisinnaapput. Suliffeqarfiillu Kalaallit Nunaanniittut Danmarkimiittullu assigiimmik amminut akiliisussaapput. Pisiniarfiit amminik tuniniaasartut akilersuisitsisarneri susassaqarfiginngilagut, namminneq akitigut aalajangersaasarput, Henrik Estrup oqarpoq nassuiaallunilu suliffeqarfinnut kiisalu pisiniarfinni pisisartunut akigitinneqartut assigiinngissusai oqaatigisinnaanagit, tassami suliffeqarfiup tamanna kisimi susassaqarfigimmagu.
Nunani allani kaattaassinermi kingullermi ammit 700-it pitsaassutsimik c-mik nalunaaqqutsikkat tunineqartut Henrik Estrup oqarpoq. Ammillu pitsaassutsinut A, B, C ammma D-inut Qaqortumi ammerivimmi immikkoortinneqartarneri erseqqissarpaa.
Nunatsinni illoqarfinni tamani Great Greenlandip amiutaanik niuertoqannginnera aamma pisisartunit uparuarneqarpoq, naak ammit toqqortarineqartut amerlasuutut oqariartuutigineqartartut.
- Amminik tuniniaanerunissaq anguniarlugu suliniuteqaannavippugut, Pisiffimmut Brugsenimullu akikitsunik amminik niuertarpugut, mersortarfiillu akikitsunik nioqquteqarnissaat anguniarlugu neqeroorfigisaqattaartarpagut. Nittartakkakkut Great Greenland aamma pisiniarfigineqarsinnaavoq imaluunniit toqqaannartumik attaveqarnikkut pisiniartoqarsinnaalluni, Henrik Estrup oqarpoq. 2010milu puisit amiinik tuniniaaneq 14 procentimik qaffariarsimasoq oqaatigalugu.
Great Greenlandip amiutaanik pisinairfinni pitsaanngitsunik pisiaqarsimasut pisiniarfimmut utertitsillutik naammagittaalliuuteqartarnissaat, pisortap Henrik Estrupip aamma kaammattuutigaa, Great Greenlandimulli aamma naammagittaalliorusuttut tusaaneqarusupput.
