Nunanut allanut ministeri Pituffik pillugu nassuiaasussanngorpoq
Inuit Ataqatigiit qallunaat partiiannit arlalinnit taperserneqarluni, isumasioqatigiinnissamut aggersaanerata kingorna tamanna pisussanngorpoq.
Amerikamiut suliffeqarfiutaata Pituffimmi sakkutooqarfimmik aserfallatsaaliuisussatut isumaqatigiissuteqarfiginerani, Danmarkip Kalaallit Nunaatalu Illersornissamut isumaqatigiissutaata, USA-mik isumatigiissut illuatungiliuttutut inissisimava?
Aamma atuaruk Pituffimmi kiffartuussinissamik isumaqatigiissutip annaaneqarnera politikerit ernumanartoqartikkaat
Kiisalu qallunaat kalaallillu naalagaaffiup allanut attaveqartitsisui, malittarisassanik erseqqissaaniarlutik amerikamiunut qanoq iliuuseqarsimappat?
Apeqqutit tamakkua tassaapput, qallunaat nunanut allanut ministeriata, Martin Lidegaardip, Pituffimmi pisimasunik nassuiaateqarnerani, IA-p akissuteqarfigitinniagai.
- Isumasioqatigiinnissamut tuaviortumik aggersaanermi neriuutigaara, nunanut allanut ministeri peqatigalutigu, sullissinissamut atsioqatigiilluni isumaqatigiissut pillugu kiisalu taassuma Kalaallit Nunaannut Danmarkimullu sunniutissai pillugit sukumiisumik paasissutissinneqarnissarput, Johan Lund Olsen oqarpoq.
Aamma atuaruk Greenland Contractors Pituffimmi sullissiunnaassaaq
Isumasioqatigiinnissamut tamanut ammasumut, SF kiisalu Enhedslisten aggersaaqataapput.
Naalakkersuisooqataasuni Socialdemokratini Kalaallit Nunaat pillugu oqaaseqartartoq Flemming Møller Mortensen oqarpoq, suliamut pineqartumut atatillugu Folketingip iliuuseqarsinnaanissaa apeqquserlugu.
Naalagaaffiulli allanut attaveqartartuisa qallunaat kalaallillu, suliamut atatillugu iliuuserisaat, nammineq tapersersornerarpai.
Isumasioqatigiissitsinissaq juullertinnagu pisussaassagunarpoq. Isumasioqatigiinnermi Folketingip Illersornissamut ataatsimiititaliaa aamma aggersarneqarpoq.