Ilaqutariit kalaaliunerat pillugu inissiaatileqartigiiffimmit itigartitaasut
Angutip kalaallip paniatalu kalaaliuneri pissutigalugit Aarhusimi inissiaatileqatigiiffimmit initaarnissaannut itigartinneqarput. Pisorlu Aarhusimi kalaallit illuata alianarnerarpaa.
Pavia Joelsen Aarhup eqqaani Vibymi inimik neqeroorutaasumik innersuunneqareerluni isumaqatigiissuteqarniarluni inissiaatileqatigiiffimmut oqarasuaatikkut saaffiginnippoq, sianereersorlu tamanna allanngorujussuarpoq.
Jyllands-Postenip immikkoortortaqarfia, JP Aarhus taama allaaserisaqarpoq.
Pavia Joelsen panialu qulingiluanik ukiulik inimik neqeroorfigitillutik inissiaatileqatigiiffimmit mailikkut attavigineqarasimagaluarput.
AAMMA ATUARUK Kalaallinik Danmarkimiittunik assigiinngisitsisoqarpoq
AAMMA ATUARUK Vigtigt at holde fokus på diskrimination
Oqarasuaatikkut oqaloqatigiittoqareersorlu inissiamik takusaanissaq inissiaatileqatigiiffimmit taamatitinneqarpoq, inissiaatileqatigiiffik nunanit allaneersunik attartortussanik neqeroorsinnaanngimmat.
Tamannalu Pavia Joelsenimit pakatsissutigineqaqaaq, kalaallimmi qallunaatut innuttaassuseqareerput.
Suliffeqarfiup inissianik attartortitsisartup Due og Krøyerip, aviisimut JP Aarhusimut uppernarsarpaa, inissiaatitik nunanit allaneersunit kalaalliniillu attartortinneqarneq ajortut, inissiaateqarfinni ataqatigiimmik aaqqissuussineq paasisinnaanngimmassuk, piginnittoq, Christian Krøyer tunngavilersuilluni taama oqarpoq.
Pisoq pillugu alianartoq, Aarhusimi kalaallit illuanni pisortaq, Jørnn Holbech oqarpoq, taannalu isumaqarpoq, inissiaatileqatigiiffik kalaallinik immikkoortitsinermigut kalaallinik Danmarkimiittunut immikkoortitsinermik attassisooqataanerarlugit.
Pavia Joelsenip paniatalu maanna inigisartik juulip aallaqqaataanit qimattussanngorpaat.
