Grønlandsbankip angusani naammagisimaarpaa

Grønlandsbanken 2015-imi akileraarutit suli ilanngaatiginagit 106 millionit koruunit missarluinnaanik sinneqartooruteqarpoq.

Allattoq Inge S. Rasmussen

februaarip 24-at 2016 06:26

Nutserisoq Simon Uldum -

Aningaaseriviup tamanna "angusatut naammaginartutut" taavaa, naak angusat ukiup siuliani 131,4 millionit koruuninik sinneqartooruteqarnermut naleqqiullugit ikinnerugaluartut.

Grønlandsbankilu aktiaatilinnut ukiuni sisamani ataannartumik aktianit iluanaarutinik, aktiamut ataatsimut 55 koruuninik, aktiaatilinnut tunniussaqarpoq. Aktianit iluanaarutit katillugit 99 millionit koruuniupput.

BNP-mi ukiuni kingullerni pingasuni amigartooruteqarsimaneq erniallu appasinnerat inuiaqatigiit aningaasaqarnerannut pitsaanngitsumik sunniuteqarsimanerat aningaaseriviup angusaanut aamma sunniuteqarpoq.

Aamma atuaruk GrønlandsBANKEN meeqqanut inuusuttunullu kræftimik napparsimasunut tunissuteqartoq

- Taasanit tamanit tatineqarsimavugut, taamaammat taakku qiviarutsigit, ukiumi angusat naammagisimaarnarput, aningaaseriviup pisortaanera Martin Kviesgaard tusagassiorfinnut nalunaaruteqarluni taama allappoq.

Aningaaseriviulli taarsigassarsiartitaasa siorna ukiup naalernerani qaffalaarsimanerat nutaarsiassaavoq nuannersoq. Tamannami ukiuni kingullerni sisamani aatsaat pivoq.

Akit qaffakkiartulernissaannik erniallu appasiinnarnissaannik naatsorsuuteqarneq tunngavigalugu, Grønlandsbanken ukiumut naatsorsuuseriffiusumut 2016-imut mianersornerulaarluni naatsorsuuteqarpoq.

Aningaaseriviup 125-145 millionit koruunit missaannik angusaqarnissani naatsorsuutigaa.

Aamma atuaruk Grønlandsbankenip SIFI-tut taaneqarnissani sulissutigaa