Nunarput Nordic Futsal Cupimi unamminermi siullermi ajorsartoq
Kalaallit Futsalimik nunanut allanut unammisartui nunat avannarliit futsalerlutik unammineranni Finlandimut ippassaq unammigamik Finland ajugaavoq.
Allattoq Jonas Fievé
decembarip 07-at 2017 08:08
Kalaallit angutitaat futsalimik nunanut allanut unammisartut ataatsimik isertitaqarlutik ajorsarput, Finland sisamanik isertitaqarput.
Nunat avannarliit futsalertartui Norgemi Nordic Futsal Openimi ulluni makkunani unamminneranni peqataapput.
Nordic Futsal Openimi unamminermi Finland Kalaallit Nunaallu siulliullutik unammipput.
Kalaallit futsalimik nunanut allanut unammisartui Sverigemut, Danmarkimut Norgemullu ulluni tulliuttuni pingasuni unammissapput.
Kalaallit Nunaata Sverigellu unamminerat ullumi sisamanngornermi nal. 15 pissaaq. Unammineq KNR-ikkut isiginnaarneqarsinnaavoq.
