GE: Nunarput innuttaasunut amerlanernut periarfissanik annaasaqarfiusinnaavoq
Nunatsinni aalisarneruneq sanaartornerunerlu pissutigalugit 2016 inuussutissarsiorluarfiusoq, Sulisitsisut Peqatigiiffiata ukiortaami oqaaseqaataani erseqqissaatigineqarpoq.
Tamatumali saniatigut politikerit naalakkeruisullu sulisitsisunit nersorneqarpallaanngillat. Naalakkersuisoqatigiit nutaat, Siumumit, Inuit Ataqatigiinnit Partii Naleqqamiillu ilaasortaaffigineqartut, namminersulivinnissaq salliutillugu sulipput, naak namminersulivinnissatsinnut aaqqinneqartussat pisariaqartut suli naammassineqanngikkaluartut, Sulisitsisut Peqatigiiffiannit oqaatigineqarpoq.
- Akileraartarnikkut oqilisaavigineqarnissaq, atugarissaarnissamut pilersaarutit suli aningaasartuuteqarfiuneruleriartortut neriorsuutigineqaatigalutik pisortat oqimaaqatigiittumik aningaasaqarniarnissaat naalakkersuisoqatigiit isumaqatigiissutaanni neriorsuutigineqarpoq, Sulisitsisut Peqatigiiffiat allappoq.
AAMMA ATUARUK Innuttaasut ukiortaami oqalugiaataat
Sulisitsisut Peqatigiiffiata namminersulivinnermut tapersersuillutik erseqqissaatigaa. Aningaasaqarnikkulli imminut napatissinnaaneq tamatumunnga pisariaqarpoq.
Tamannalu qulakkeerniarlugu politikerit iliuuseqartariaqartut, Sulisitsisut Peqatigiiffiannit oqaatigineqarpoq.
- Inuit inuuniarnermikkut ajornartorsiutilippassuit sulisilernissaannut aaqqissuusseqqinnerit suliassanullu pilersaarusiat tutsuiginartut amigaatigaagut. Aamma ilinniartitsinermi angusanik takusaqarnissaqarusuppugut, ilaatigummi meeqqat atuarfiini angusat akuerineqarsinnaanngilluinnarmata, Sulisitsisut Peqatigiiffiat allappoq.
Ajornartorsiutit taakku politikerinit aaqqiivigineqanngippata innuttaasut akornanni naligiikkunnaariartortoqassasoq, sulisitsisut isumaqarput.
AAMMA ATUARUK Namminiilivissagutta ilinniartariaqartugut
AAMMA ATUARUK Oruluallaarneq namminiilivinnissamut aqqutissaanngilaq
AAMMA ATUARUK Alloriarnerit siulliit pingaaruteqartussat amigaataapput
