Bornholmimi inuit naapinneranni nunarput ilaasoq

Inuit naapinnerat Folkemødet Bornholmimi sisamanngornermiit sapaammut ingerlanneqassaaq.

Arfininngorpallu Folkemødet-imut takkuttut ullormut 20.000 tikillugit amerlassusillit Kalaallit Nunaat pillugu pisussani qulini paasisassaqartinneqassapput, pisussat ilagaat nipilersoqatigiit nunatsinneersut Suluit tusarnaartitsinissaat.

Aamma Kalaallit Nunaata aatsitassarsiorfiit pisuunersaattut inissisinnaanera pillugu takornariartitsisarnerillu nutaat pillugit oqallittoqassaaq.

"Kalaallit Nunaata ineriartornissamut periarfissai aallaavigalugit Kalaallit Nunaanni pissutsit periarfissallu assigiinngitsuniit isigalugit takutinneqarnissaat siunertaavoq. Taamaalilluni pilersaarutaavoq Folkemødet-imi peqataasut Kalaallit Nunaata suuneranik aannertunerusumik paasisaqartinniarlugit immaqalu sumut ingerlanissaanik tikkuaassinermik siunnersuuteqartinniarlugit," Danmarkimi Kalaallit Nunaata aallartitaqarfiani immikkut siunnersorti Jens Heinrich nassuiaavoq.

Kalaallit Nunaat pillugu sammisaqartitsinerit nunatta Danmarkimi aallartitaqarfianit aaqqissorneqarput- Royal Greenland,

Royal Arctic Line, Tele Post, Air Greenland, Danmarkimi kalaallit illui aamma Issittumi sakkutooqarfik suleqatigalugit.