NALUNAARUSIAQ Danmarkimi kommuunit siunnersuisoqatigiivini kalaallit peqataalik
Kalaallit danskisut innuttaassuseqarlutik inunngortaraluartut, danskit kommuuniini akuunerulernissaq eqqartorneqartillugu kalaallinit kingoqqisut peqataasariaqarput.
Kattuffimmi Inunni Danmarkimiittumi siulersuisunut ilaasortaq Charlotte Nebel Pedersen taama isumaqarpoq.
- Siunnersuut assut nuannerpoq. Uagut kalaallit peqatigiiffii 23-it sinniisuuffigaavut, amerlaqisullu naapittarlugit. Illoqarfinnilu anginerni sinniisoqarsinnaagutta kalaallinut Danmarkimi inooqataaniarnikkut ajornartorsiuteqartunut suliniarnermut assut iluaqutaassagaluarpoq.
Aamma atuaruk Kalaallit danskit kommuuniini peqataalersitsinissamut siunnersuisoqatigeeqalertariaqarput
Danmarkimi Inuit pisinnaatitaaffii pillugit ilisimatusarfik kalaallit kommunit akuunerulernissaq pillugu siunnersuisoqatigiivini peqataatitaqalernissaat pillugu siunnersuuteqartuuvoq.
Ilisimatusarfik taama siunnersuuteqarpoq paasineqarmat kalaallini Danmarkimiittuni kommuninut saaffiginnittut tallimaangaangasa ataaseq kinaassusersiorfigineqartartoq.
Peqatigiiffimmi Naalagaaffeqatigiinnermi siulittaasoq Nauja Lynge isumaqarpoq inuiattut ikinnerussuteqartut pillugit pisortat siunnersuisoqatigiivini kalaallit issiatitaqartariaqartut.
- Assersuutigalugu Folketingimi Etnisk Råd for Minoriteter aalajangiisartunilu allani kalaallit peqataatitaqalissagaluarput.
Aamma atuaruk Inuiattut ikinnerussuteqartutut inissisimalernissaq ministerip itigartippaa
Christiansborgimittaaq kalaallit folketingimut ilaasortaatitaasa kalaallit siunnersuisoqatigiinni aamma Etnisk Råd for Minoriteterimi peqataatinneqalernissaat tapersersorpaat.
Nunasisut akuunerulersinneqarnissaannut ministeri Inger Støjberg suliaq pillugu oqaaseqarusunngilaq.
Aamma atuaruk Kalaallinik Danmarkimiittunik assigiinngisitsisoqarpoq
