Google isumaqatigiissuteqarpoq: Frankrigimut 7,2 milliardinik akiliissaaq

Internetikkut nittartagaq Google, paasisassanik ujarlerfiusoq, Frankrigimit akiliisitaarujussuanngortitaavoq, akileraarutitigullu akilersimanngisat taassuma saniatigut aamma akilertussanngorlutik.
Googlep Europami qitiusumik allattoqarfia Irlandip illoqarfiisa pingaarnersaanni Dublinimi inissisimavoq. Googlelu Frankrigimut akileraartarsimanersoq franskit misissuisartuisa misissorpaat.
Allattoq Ritzau
septembarip 13-at 2019 10:15

Google 1 milliardit Eurongajannik, tassa 7,2 milliardit koruuninik akiliisussanngortitaavoq.

Suliffeqarfissuaq amerikamiunit pigineqartoq taama ilisimatitsivoq, akiligassap annertussusissaa isumaqatigiissusiornikkut anguneqarluni.

Google pillugu ukiuni kingullerni sisamani misissuinerup naammassinerani Googlep Euronik milliardit affaasa missaannik akiliinissani akuerisimagaa, Frankrigimi unnerluussisussaatitaasup nalunaarutigaa, taassumalu saniatigut akileraarutit akilinngitsuukkat 465 milliardit Eurot akilertussanngorlugit.

- Soorlu Frankrigimi eqqartuussiviup aalajangeraa 500 millionit Euronik akiliinissarput isumaqatigiissutigaarput, akileraatutitigullu akiligassat 465 millionit Eurot taassuma saniatigut akilissavagut, Google taama allaaserisaqarpoq.

Akileraarnikitsuaraasoq

Googlep Europami qitiusumik allattoqarfia Irlandip illoqarfiisa pingaarnersaanni Dublinimi inissisimavoq.

Google Frankrigimi akileraarutinik piaaraluni akiliinngitsoortarsimanersoq misissuisartut Frankrigimeersut misissorsimavaat, Googlellu suliaminik ilaatigut nalunaarutiginnittarsimannginnera paasineqarluni.

Google nunani Eu-mi nunani assigiinngitsuni akileraarutitigut annikitsuinnarmik akiliisarpoq, tunisaqarninimi tamaasa Irlandimi taamaallaat nalunaarsortarmagit.