Grønlandsbankenimut ukioq iluanaarfiulluartoq
Ukioq 2017 Grønlandsbankenimut angusarissaarfiuvoq, aningaaseriviup ukiumoortumik naatsorsuutaani sapaatip akunnerani uani tamanut saqqummiunneqartuni kisitsisit tamanna takutippaat.
Ukioq manna angusat akileraarutit ilanngaatiginnginnerini 132,6 millionit koruuniupput, 2016-imi 113,4 millionit koruuniullutik.
Aningaaseriviullu pisortaata Martin Kviesgaardip aningaaseriviup angusai tupaallannanngitsumik nuannaarutigai:
- Siuariartortoqarnera takusinnaallugu soorunami naammagisimaarluarparput, Martin Kviesgaard tusagassiorfinnut nalunaarummi taama allappoq.
Aningaaserivik naapertorlugu Nunatta aningaasaqarnerata ukiuni kingulliunerusuni siuariartorfiunera aningaaseriviup sulisuinut ulapaartitsivoq.
Aningaaseriviup taarsigassarsiarititai 8,5 procentinik qaffariaateqarput, taarsigassarsiarititallu tamarmiusut taamaalillutik 3,3 milliardit koruuniullutik, oqaluttuarisaanermilu aatsaat taama qaffasitsigisut aningaaserivimmit oqaatigineqarpoq, Martin Kviesgaardilu tamanna pillugu ima oqarpoq:
- Taarsigassarsiaqartitsinikkut ukiuni kingulliunerusuni siuariartorneq nuannaarutigaarput. Aningaasarsiornikkut siuariartortoqarnera ersarippoq, aamma sullitavut nioqqutissanik pilerinartunik neqeroorfigisinnaallugit aningaaserivittut unammillersinnaassuseqarnerput tulluusimaarutigarput, aningaaseriviup pisortaa taama oqarpoq.
Aningaaserivillu angusarissaaraluarluni aningaaserivimmik piginneqataasunut iluanaarutisiassat 55 koruuninit 30 koruuninut appartinniarlugit toqqarsimavaa, aningaasallu taakku aningaaseriviup nukittorsaqqinnissaanut atorneqassapput.