GME-p aktiaatiminit tuniniaaneq unitsippaa
Ullaaq arfineq pingasunngoriillatsiartoq Greenland Minerals and Energip nalunaarutigaa aktiaateqarnertik tamaanga kipisillugu, Naalakkersuisut uraanitalinnik aatsitassarsiortoqannginnissaanik aalajangersakkap atuutsiinnarnissaanik aalajangernerat pissutaalluni.
Greenland Minerals and Energymit, Kuannersuani atorfeqartunit oqaatigineqarpoq ukiamut inatsisartut ataatsimiineranni aalajangertoqarnissaata tungaanut Kuannersuaq ingerlatiinarneqassasoq.
Ilanngullugu aamma oqaatigineqarpoq, sapaatip akunnerata tulliani Greenland Minerals and Energip atorfilittai Naalakkersuisunik oqaloqateqassasut, Kuannersuup qanoq ingerlariaqqissinnaanissaa oqaloqatigiissutigineqassalluni.
Kuannersuit News-imi, tassa quppersagaq illunut agguaanneqarsimasuni atuarneqarsinnaavoq Kuannersuaq siunissamut ingerlaanassaguni, Namminersorlutik Oqartussanit aningaasat 300 milliuunit koruunit pisariaqartissagaat.
- Piffissami matumani qillerinivut unitsippavut. Maannamut 9.600 miiterit qillersimavagut naak naatsorsuutigineqarsimagaluartoq 10.000 miiterit qillerneqartussaagaluit. Qillerinerigaluarput maanngaannaq unitsipparput qillerut aserormat. Nutaamik qillereqqikkumanata, qilleriikkavut nangiinnarpavut, taamak Roderick McIllree Sermitsiaq.AG-mut oqarpoq.