GME neriorsuivoq: Qinnuteqaat piariingajalerpoq
Misissueqqissaarnerit kingulliit marluk naammassineqarnerisa nalunaarusiarineqarneri, Naalakkersuisunut nassiunneqarnissaat piareeqqasut, aatsitassarsiorfiutileqatigiiffiup, Greenland Minerals and Energy-p nalunaarutigaa.
Kuannersuarni aatsitassanik qaqutigoortunik piiaalerniissamut misissueqqissaarnerit ukiuni arfineq marlunni ingerlanneqareerput. Misissueqqissaarnerillu nalunaarusiarineqarneri pingaaruteqarput, aatsitassanik qaqutigoortunik piaasoqalersinnaaneranik Nammisorlutik Oqartussanit Kommuni Kujallermillu akuerineqarnissaat.
Aatsitassat piiarneqalernissaani pingaaruteqarluinnarpoq, avatangiisit innarlerneqannginnissaat taamatullu Narsami innuttaasunut ulorianaateqannginnissaa pingaaruteqaluni.
Misissueqqissaarnermi nalunaarusiat marluk
Greenland Minerals and Energy-mit ilisimatitsissutigineqanngilaq, misissueqqissaarnermi nalunaarusiat marluusut qaqugorpiaq nassiunneqarumaartut. Taakkuli nassiunneqareerpata aatsaat paasinarsissaaq, aatsitassat qaqutigoortut, aatsitassat uranitallit aatsitassallu allat qanoq mianersuunneqartigalutik nunamit qallorneqarumaarneri.
Kuannersuarni misissueqqissaarnerni GME-p suleqatigai danskit suliffeqarfii aallat marluk, tassaasut Orbicon aamma Grontmij. Tassalu taakku misissueqqissaarnerisa inerneri, Naalakkersuisunit kommunimillu itigartitsissutigineqassanersut imaluunniit akuerineqassanersut utaqqisaaginnalerluni. GME akuerineqaruni, aningaasanik millionilikkaanik aningaasaleerusuttunik aatsaat ujarlilersussaassallutik nalunaarutigaat
AAMMA ATUARUK Aatsitassarsioqatigiiffik qimussertartunut aningaasaliivoq
GME-mit aamma ullumi nalunaarutigineqarpoq, Avannaata Qimersuanut aningaasanik tapiisarnertik ukiunik pingasunik sivisussuseqartussaq isumaqatigiissutaasoq, taamaalilluni Kalaallit Nunanni Qimussertartut Kattuffiannut ukiumut 260.000 koruuninik tapiisalissallutik.
