GME isumalluarpoq

Taamaalilluni ingerlatseqatigiiffiup Kuannersuarni misissuinerani atugarititaasut allanngortinneqarput, tassa suliffeqarfik aatsitassanik radiop qinngornerinik ulorianartunik killissarititaasut qaangerlugit akulinnik misissuisinnaalissaaq.

GMEp Naalakkersuisunut nalunaarutigimmagu ingerlatseqatigiiffiup imminut akilersinnaassutsimut misissuinernik taaneqartartut kiisalu suliaqarfissami avatangiisinik, peqqinnissamut aammalu inuiaqatigiinnut sunniutaasussanik nalilersuinerit naammassisinnaassagunigit, qinngornerit ulorianartut akuusut ilanngullugit pisinnaatitsissummut killissarititaasut ersarinnerusut ingerlatseqatigiiffiup pisariaqartikkai.

Misissuinissamut akuersissutip allannguutaani ersarissarneqarpoq, Greenland Minerals and Energy pinngoqqaatinik qinngornernik ulorianartunik akulinnik piiaanissamut akuersissummik tunineqarnissamut pisinnaatitaaffeqanngitsoq.

Taamaattumik aalajangerneq Naalakkersuisooqatigiit Qoornumi isumaqatigiissutaanik sanioqqutaarinngilaq, tassanimi Naalakkersuisut akuersaanngilluinnarnissamik isumaqatigiissutertik attatiinnarniarlugu isumaqatigiissutigaat aammalu tamatuma allanngortinneqarsinnaanerata nalilersorneqartarnissaa isumaqatigiissutigineqarluni.

Misissuinermut atugassarititaasut allanngortinneqarneri ingerlatseqatigiiffiup nuannaarutigai:

- Greenland Minerals and Energy A/S-imit periarfissaq una atorlugu Naalakkersuisut tapersiinerat pillugu qutsavigissavagut, taamaalilluta Narsami suliffeqarfitsinni 2012-mi 2013-milu suliassatut pilersaarutivut ingerlateqqissinnaanniassagatsigit, tusagassiutinut nalunaarumminni allapput.

GME sumiiffimmi pineqartumi misissuinernit aatsitassanik akulimmik piiaaffigineqarsinnaasumik 619 Millionit tonsinik annertussusilimmik nassaarsimavoq.  Tassani aatsitassat qaqutigoortut 6,6 millionit tonsinik annertussusillit, 350 millionit pund uran-oxid aamma zinki 1,3 millionit tonsi piiarneqarsinnaasussatut sumiissusersineqarlutik.

Kuannersuarni aatsitassat nassaarineqartut uranimik thoriumimillu akui akuersaanngilluinnarnissamik killiliussat qaangingaatsiarujussuarlugit qaffasissuseqarput.

GME ilisimatitsivoq naatsorsuutigalugu suliniutip imminut akilersinnaassuseqarnera paasiniarlugu misissuinerit aammalu peqqissutsimut, avatangiisinut inuiaqatigiinnullu sunniutigisinnaasai paasiniarlugit misissuinerit 2012-ip naajartornerani naammassissallugit, 2013-imi piiaasinnaanissamik qinnuteqaateqarniarlutik.