GM-mi aaqqissuisut: Ajorsassalluta avalannianngilagut
SAK Sisimiuniit kiisalu T-41 Aasianniit sapaatiuppat nalunaaqutaq ataatsinut GM 2011 ammarlugu arsaq isimmillugu aallartikkunik, tassaassaaq arsartartoqatigiit ukiut aqqanillit missaanni imminnut unammisimanngitsut naapinnerat.
Charles Mølgaard T-41 angutitaani sungiusaasoq oqarpoq, unamminerup ingerlanissaa inernissaalu siumut nammineq oqaaseqarfigereersinnaanagu, unamminissarlu naammassippat inernera nalunarumaanngitsoq.
Oqarlunili ilimagisimagaluarlugu ukiut sisamat tallimat qaangiuppata, aatsaat namminneq qaffasinnernut inissikkumaarlutik, maannali pitsaanerit qulit akornannut inissereernertik tupaallaatigalugu.
- Tupaallatsitsingaatsiarpugut, ilimagineqarnikuunngikkaluarpugummi taamak sukkatigisumik siuariartussasugut. T-41-mmi arsartartuisa aallarteqqinnerannit ukioq ataasiunngilarluunniit , Charles Mølgaard KNR-imut oqarpoq. Nangillunilu oqaatigalugu, unamminermi aqutsisup siggarnissaa kingulleq tikitserlugu akiuutissallutik.
Hans Frederik Olsen SAKp sungiusaasuata isertuutinngilaa Aasiammiunut ataqqinninnertik.
- Naapittussaavagut unammisaqattaarnermut misilittagaqalaalereersimasut, akerlianik uagut tamanna maannamut misilittagaqarfiginngilarput , taamaattumik uagut misilittakkagut killeqangaatsiarput, SAKp sungiusaasua oqarpoq.
Isertuunnagulu oqarluni namminneq angerlarsimaffimminni pissartanngorniunnerit ingerlanneqartussaanerat pissutigalugu, isiginnaartuminnit piumaffigineqangaatsiartussaanertik unammilligassanut ilaassasoq.
- Ajorsassalluta arsaaffimmut avalannianngilagut, killissaa tikillugu akiuutissaagut, Hans Frederik Olsen oqarpoq.
Nuna tamakkerlugu sungiusaasup Tønnes OK Berthelsenip knr.glimut ippassaanikkunni pissartanngortussanik siulittuinera pillugu aperineqaramik. akissuteqarlutik oqaatigaat , tamanna eqquussinnaasoq imaluuniit eqquutinngitsoorsinnaasoq. Tønnes OK Berthelsenillu oqaaseqarnini nammineq akisussaaffigissagaa erseqqissaatigalugu.
