GM-marathon illoqarfinni aamma allani
42 kilometerit 195 meterillu...
Sakkutooq Phillipedes Grækenlandimi illoqarfimmit Marathonimit Athenimut ukiut 2500-it matuma siornagut arpammat tassa taama isorartutigaaq, sakkutuut illoqarfik Marathon tiguarsimammassuk pissaanermik tigumminnittut nalunaarutigiartorlugu.
Pisoq taanna ullumikkut marathonimik arpannermik taaguuteqartinneqarpoq. Maannalu tassa piffissanngorpoq Kalaallit Nunaat tamakkerlugu marathonerluni 42,2 kilometerisut isorartutigisumik arpattalernissaaq.
Nuummi marathonerluni ukiuni arlalinngortuni ukiut tamaasa arpattoqartarpoq, taanna Nuuk Marathonimik taaguuteqartinneqarluni. Illoqarfinni allani marathonerluni aamma arpattoqartarpoq, mannali tikillugu Nuummi marathonerluni arpattarnerit pisortatigoortumik pissartanngorniunnertut naatsorsuunneqartarlutik.
Tamanna Kalaallit Nunaanni Timersoqatigiit Kattuffiannit maanna allanngortinniarneqalerpoq. Nunarput tamakkerlugu marathonimik arpalluni pissartanngorniuttarneq illoqarfinni assigiinngitsuni ukiut tamaasa unammissutigineqartalissaaq.
Marathonerluni pissartanngorniunnerit tulliani Aasianni pissapput - Aasianni aaqqissuussinermi Midnigth Sun Marathonertitsinermi.
Tamanna pissaaq aasaru juunip ulluisa 29-anni, unnukkut qulingiluanut aallartissalluni.
Nuna tamakkerlugu Marathonerluni pissartanngorniussamut ataatsimiititaliamik Aasianni pilersitsisoqarpoq,
arpatitsinissamullu pilersaarutit kingusinnerusukkut saqqummiunneqarumaartut, Kalaallit Nunaanni Timersoqatigiit Kattuffianiit Claus Nielsen ilisimatitsivoq.
