Glyngøremi fabrikki matulertoq
Fabrikkimi aqutsisut sulisullu sinniisui isumaqatigiissuteqarput, Glyngøremilu fabrikkip aningaasatigut ingerlalluartortaa Royal Greenlandip Aalborgimi fabrikkiutaanut nuunneqassasoq isumaqatigiissutigineqarpoq.
Glyngøremilu fabrikkip sinnerata, ukiuni qulini atanikuusup, matuneqarnissaa aamma isumaqatigiissutigineqarpoq.
- Isumaqatigiinniarnerit ingerlalluarsimapput, inernerineqartullu iluarineqarlutik. Sulisartut eqqorneqartut isumagilluarneqarput. Tamanna tamatsinnut pingaaruteqarsimavoq, Royal Greenlandip Glyngøremi fabrikkiani tunisassiornermut pisortap, Lars Nielsenip, Royal Greenlandip nittartagaanut oqaatigaa.
Royal Greenlandip Glyngøremi immikkoortortaqarfia raajanik lage-kkannik tunisassiorfiusoq iluanaarutaanngitsumik ukiuni arlalinni ingerlammat matuneqartussangortoq, Royal Greenlandip pisortaanerata Mikael Thinghuusip qanittukkut oqaatigaa.
- Glyngøremi tunisassiorfik Royal Greenlandip tunisassiorfiinut allanut sanilliullugu aningaasatigut annaasaqaatigisimasavarput, Mikael Thinghuus, ukioq manna novembarip tallimaani ilaatigut oqarpoq.
Glyngøremi sulisut 65-iusut affaat soraarsinneqassasut, affaallu immikkoortortanut iluanaaruteqarfiusunut nuunneqarumaartut, taassuma oqaatigaa.
Glyngøreminnganniit Aalborgimut nuussinerup aappaagu januaariminngaanniit aallartissinnaanissaa, Royal Greenlandip naatsorsuutigaa, poorskereerpallu naammassineqarsimanissaa naatsorsuutigineqarluni.