Qineqqusaarnerup naammassiartornerani aviisit akeqanngitsut
Tusagassiornermi suliffeqarfimmik pisortaq aamma aviisimi Sermitsiami akisussaasuulluni aaqqissuisoq Poul Krarup taama nalunaaruteqarpoq.
Innuttaasut tamat oqartussaaqataanerannut peqataanerusinnaanissaat anguniagaasoq, taassuma oqaatigaa:
- Nunatsinni taasiartortartut Nunani avannarlerni nunanut allanut naleqqiullugu ikittuinnaapput, neriuppugullu tamanna allanngortissinnaassallugu, Poul Krarup oqarpoq.
AG Sermitsiarlu qineqqusaarnerup naammassiartulernerani saqqummersinneqartussat taamaammat pisarnermit amerlanerussapput, akeqanngitsumillu Nunatsinni Danmarkimilu sumiiffinni aalajangersimasunut siammarterneqassallutik.
Nunaqarfiit tamakkerlugit anguneqarsinnaanngillat, aviisilli nunaqarfinni pineqartuni elektroniskinngorlugit, akeqanngitsumillu atuarneqarsinnaassapput.
Sermitsiaq novembarip ulluisa 21-anni saqqummertussaq akeqanngitsumik saqqummersinneqassaaq, AG-lu novembarip ulluisa 26-anni akeqanngitsumik saqqummersinneqassalluni.
