Poorskip nalaani arlalinnik pissartanngorniuttoqassaaq
Aasianni sulorarluni pissartanngorniunneq, Sisimiunilu U-16-imi assammik arsarluni pissartanngorniunneq ullumi aallarteriarlutik apriilip sisamaanni naammassissapput.
Nerrivimmi arsaararluni pissartanngorniunnerit Ilulissani aqagu aallartissapput, kikkullu Nunatsinni nerrivimmi arsaarallaqqinnerpaanersut pissartanngorniunneranni apriilip pingajuanni naammassippata paasinarsissapput.
Alorarnermi takutitsisaqattaarlunilu freestylernermi pissartanngorniunnerit Nuummi apriilip aallaqqaataanni aallartissapput. Aaqqissuisut, Snowball, Norgemit Sverimiillu sisorarfissaliortussanik tikisitsisimapput, unamminerillu apriilip arfernanni naammassinissaasa tungaanut sulissallutik.
Nuummi aamma volleyballimi pissartanngorniunneq apriilip aappaanniit apriilip tallimaannut ingerlanneqassaaq. Poorskip nalaani pissartanngorniunnerni kingulliullutik aallartissapput Sisimiuni sangusaarluni pissartanngorniunnerit.
Sangusaarnermi pissartanngorniunnerit apriilip aappaanniit apriilip sisamaata tungaanut ingerlanneqassapput. Poorskip nalaani timersornerit saniatigut, assammik arsartartut inersimasut, Nuummi apriilip 20-anninngaanniit apriilip 25-ata tungaanut pissartanngorniutissapput.
Nunatsinni pissartanngorniunnerit pillugit sinerissami aallakaatitassiarineqarsimasut arfiningorpat apriilip sisamaanni KNR-TV-kkut unnukkut arfineq pingasuniit qulit qeqqata tungaanut isiginnaarneqarsinnaapput. Sapaammilu inersimasut Volleyballimi pissartanngorniunnerinit ajugaanniutivinnerit toqqaannartumik aallakaatinneqassapput.
