PISUSSAT Kommunep aningaasaqarnera imaassaaq
Qaasuitsup Kommuniata avinneqarnissaa qaammatinik arfineq pingasunik sivisussuseqassasoq siunnersuisarfik BDO nalunaarusiami siorna juunimeersumi taama erseqqissaavoq. Avinnissaa aalajangiunneqarmat taakku Naalakkersuisunit suliassinneqarsimapput.
Katillugit 13 millioner koruuneqassaaq, qaammatinilu arfineq pingasuni ikaarsaarnissaq 16 millioneqassalluni. Tassani pisortassat, allatsissat, nittartagassat, allaffiit ilisarnaatillu suliarineqassallutik.
Aningaasartuutit Qaasuitsup nammineq akilertussaavai. Naalakkersuisulli kommunip avinnissaanut 8 millioner koruuninik aningaasanut inatsit aqqutigalugu aningaasaliisimapput, ukioq manna 5 millionit aappaagulu 3 millionit.
Ikaarsaariarneq ukiortaami 2018-imi naammassippat Kommuni avannarlermiissapput Qaanaaq, Upernavik, Uummannaq, Ilulissallu. Kommunimi kujasinnerusumi Qeqertarsuaq, Qasigiannguit, Aasiaat Kangaatsiarlu.
BDO'p naatsorsuutigaa Kommune avannarlinngortumi aningaasaqarneq oqimaaqatigiikkumaartoq. Kommunip atugarissaarnissamut, angerlarsimaffinni paaqqinninnermut paaqqinnittarfinnullu aningaasartuutaanit akileraarutinit naalagaaffiullu tapiissutaanit isertitai annertunerulaassapput.
Kommunimili kujallinngortussami allaanerulaassaaq. Tassani ilimagineqarpoq isertitat aningaasartuutiniit ikinnerussasut, taamaattumik aningaasatigut oqimaaqatigiittoqassanngilaq, kommuni taamaalilluni aningaasanik amigaateqalissaaq.
AAMMA ATUARUK Nalunaarusiaq: Kommunip avinnissaa akisussaaq
Tamatuma kingunerisariqassavaa allaffissornikkut atugarissaarnikkullu ileqqaarnissaq imaluunniit akileraarutit qaffanneri. BDO'p ilimagaa kujallinngortussami innuttaasoq ataaseq 5.267 koruunit 6.443 koruunillu akornanni akileraarnerusalissasoq. Kommunimili innuttaasut tamarmik akileraartanngillat. Meeqqammi akileraartanngillat, taamaattumik akileraartartut suli annermik akiliinerusassapput.