GIF: Pinerliisimanngitsut kisimik sungiusaasuusinnaapput

Timersoqatigiiffinni sungiusaasut meeqqanut pinerliisimannginnermut uppernarsaammik peqarnissaat pingaaruteqartoq oqariartuutigineqarpoq.

Meeqqanut pinerliisimannginnermik uppernarsaasarnikkut timersornerup silarsuaani meeqqat pitsaasumik sinaakkusernissaat qulakkeerneqassaaq. Kalaallit Nunaanni Timersoqatigiit Kattuffianni, GIF-imi, pisortaq, Carsten Olsen, oqarpoq.

Meeqqanut pinerliisimannginnermik uppernarsaatip sungiusaasunit, timersuutini tamalaaneersunit, pissarsiarineqartarnissaa pingaaruteqarluinnartoq GIF isumaqarpoq.

- Pingaaruteqarluinnarpoq. Tassami meeqqanut inuusuttunullu timersornerup silarsuaani sinaakkutaasut ajunngitsut qulakkiissagigut pingaaruteqarluinnarpoq. Ukioq naallugu toqqissisimallutik timersorsinnaassammata, Carsten Olsen KNR-imut oqarpoq.

Sungiusaasut misissorneqartartut

Taanna nassuiaavoq, timersoqatigiiffiit nutaanik sungiusaasortaaraangata meeqqanut pinerliisimannginnermik uppernarsaat eqqarsaatigalugu ersarissunik maleruagassaqartoq.

- Sungiusaasup meeqqanut pinerliisimannginneq uppernarsarniarlugu immersuitinneqarnissaa timersoqatiigiiffinni siulittaasut pisussaaffigaat. Immersugarlu politiinut nassiunneqassaaq. Sungiusaasorlu pinerliisimanngippat immersugaa timersoqatigiiffiup siulittaasuanut utissaaq, taannalu ukiuni marlunni paarineqarsinnaalluni, Carsten Olsen nassuiaavoq.

Sungiusaasorlu pinerliinikuusimasoq paasineqarpat, timersoqatigiiffimmi sungiusaasuusinnaassanngilaq. Pineqartorlu timersoqatigiiffinni allani sungiusaasuusinnaannginnissaa aamma qulakkeerneqartarluni.

- Sungiusaasoq akuerineqarsinnaanngitsoq uppernarsaammi erserpat, taava timersoqatigiiffiup siulittaasua ilalerluni tamanna sungiusaasumut ilisimatitsissutigissavaa. Assersuutigalugu arsaattartut klubbianni taama pisoqarpat, taava klubbip pisussaaffigaa paasisaq arsaattartut kattuffiannut ingerlateqqissallugu. Tassa taamatut pinerliisimasut sungiusaasuunnginnissaat ilaatigut qulakkeerneqarsinnaavoq, taamaammat pinerliisimannginnermik uppernarsaat pingaarutilittut isigaarput, Carsten Olsen oqarpoq.

GIF sukateriniartoq

Meeqqanut pinerliisimannginnermut uppernarsaat eqqarsaatigalugu maleruagassat Kalaallit Nunaanni Timersoqatigiit Kattuffiata sukaterniarpaa, timersoqatigiiffiit qularissanngimmassuk sinaakkutit pitsaasut qanoq qulakkeerneqassasut, Carsten Olsen taama oqarpoq.

- Paasissutissanik timersortarfinni nivingasussanik maanna sanatitsileruttorpugut. Taamaaliorpugut timersoqatigiiffiit ullut tamaasa eqqaasinneqartassammata pinerliisimannginnermut uppernarsaat qanoq pingaartigineranik. Suliaq pingaarutilittut isigaarput, tassami sinaakkutit pitsaasut qulakkeerusukkatsigit, Carsten Olsen oqarpoq.  

Meeqqanut pinerliisimannginneq uppernarsarniarlugu immersugassaq politiit nittartagaanni nassaarineqarsinnaavoq, taamatuttaaq Kalaallit Nunaanni Timersoqatigiit Kattuffiata nittartagaani gif.gl-imi uani aaneqarsinnaalluni.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat