GIF: Peqatigiiffiit naatsorsuutaat pitsaanerusariaqarput

Timersoqatigiit Kattuffiata GIF-ip aallartitanik Nuummi ataatsimiisitsinera ippassaq pisoq arlalinnik aalajangiiffiuvoq. Ilagaat Peqatigiiffiit Kattuffimmi ilaasortat naatsorsuutaasa siunissami torernerulernissaanik anguniagassaq.
Allattoq Najaaraq Egede
oktobarip 11-at 2009 13:32

- Specialforbundit ukiumoortumik naatsorsuutaasa piffissaq eqqorlugu tunniunneqarneq ajornerat nalinginnaavallaaqqaaq. Timersortartut peqatigiiffiisa sungiusaasui ingerlatsisuisuilu kajumissutsiminnik sulisuugajuttarput, tamannalu kinguaattoortarnermut pissutaasinnaavoq. Amerlaqaalli naatsorsuutinik kingusinaarluni tunniussisarnermut peqqutaasartut, GIF-ip siulittaasua Nuka Kleemann oqarpoq.

Sukaterisoqarnissaa ataatsimeeqataasut tamarmik isumaqatigiissutigaat.

- Kalaallit Nunaanni timersortartut nunarsuarmi pissartanngorniunnerni peqataasartut amerliartornerat eqqarsaatigalugu timersortartut peqatigiiffii pimoorussinerullutik ingerlasariaqalerput, Nuka Kleemann nangippoq.

Kalaallit Nunaanni Timersoqatigiit Kattuffiat GIF peqatigiiffinnut nalunaarsuinikkut allaffissornikkullu ikiortariaqartunut ikiuutissalluni aamma piareersimasoq, siulittaasup erseqqissaatigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq