GEUS-ip atuagassiarisartakkani kalaallisut saqqummersikkaa: Amerlasuut atuarnissaat neriuutigigaa
GEUS-ip ilisimatuutut allaatigisatut aviisianit Sermersuaq pillugu atuagassiaq kingulleq nunatsinni atuarfinni, ilinniarnertuunngorniarfinni atuakkanillu atorniartarfinni danskisut kalaallisullu allassimasoq nassaassaaq.
Kalaallinik amerlanerusunik atuartoqartoqartalernissaa matumani neriuutaasoq, ilisimatuussutsikkut misissuivik tusagassiuutinut nalunaarummi allappoq.
GEUS, Danmarkimi Kalaallit Nunaannilu ujarassiuut misissuiviat ilisimatuutut allaatigisaannik Geovidenimik taaguuteqartumik atuagassiaateqarpoq.
Ilisimatuutut misissuiviup sammisap Kalaallit Nunaannut tunnganera pissutigalugu atuagassiap nutsertinnissaa pissusissamisoorpoq:
- Atuagassiaq kingulleq saqqummersitarput Sermersuarmi ilisimatusarnermut tunngavoq, taamaammat kalaallisuunngortillugu nutsertipparput, atuagassiami aaqqissuisoq allaatiginnittorlu, Johanne Kusnitzoff nalunaarummi allappoq.
Kalaallit atuartarnissaat neriuutigigaa
Atuagassiarlu kingulleq kalaallisuunngorlugu aamma saqqummersinneqartussaq kalaallit atuarfeqarfiinut, ilinniarnertuunngorniarfiinut atuakkanillu atorniartarfiinut nassiunneqassaaq, matumanilu kalaallit ilinniartut GEUS-ip sammisamut saqqummersitaanut maluginiaalernissaat atuagassiamillu atuarusulernissaat neriuutaavoq.
- Atuagassiap saqqummersinneqarnerani saqqumilaartitsinissaq ilisimatuutullu tunuliaqartumik atuarfinni atuartitsissutinut tapertaanissaq siunertaavoq, atuarfeqarfinnullu atuagassianik qaleriiaattunik nassiussinikkut Sermersuaq allanngoriartuleruttortoq pillugu nutaamik ilisimasaqartitsilernissarput neriuutigaarput. Allanngoriartorneq tamanna issittumi sumiiffinnut tamanut sunniuteqarpoq, GEUS paasissutissiivoq.
Sermersuaq pillugu atuagassiaq nunatsinnut nassiunneqareerpoq. Atuagassiaq atuarfeqarfinni, ilinniarnertuunngorniarfinni atuakkanillu atorniartarfinni immaqa nassaassaalereerpoq.
Atuagassiap atuartitsinermi atorneqarsinnaanissaa GEUS-ip aamma neriuutigaa.
- Atuagassiaq danskisut kalaallisullu allassimasut amerlasuut nassiuppagut, taamaammat atuartitsinermi atorneqarsinnaapput, taakkulu atuartitsiffinni atoqqinneqarsinnaajuaannarlutik, Johanne Kusnitzoff oqarpoq.
Atuagassiaq Geovidensip nittartagaatigut, kalaallisoortua geoviden.dk/sermersuaq-kkut aamma aaneqarsinnaavoq imaluunniit danskisut allassimasoq geoviden.dk/indlandsisen-ikkut.
