Gerhardt Petersen immikkut suliassaqarpoq

Taama Atassutip siulittaasua Gerhardt Petersen, Danmarkimi partiip Venstrep nuna tamakkerlugu ataatsimeersuarnerani oqarpoq.

- Atassutip qangatut nukittoorsuanngortinnissaa uannut aatsaat taama pingaaruteqartigilerpoq, Gerhardt Petersen ilaatigut taama oqarpoq.

Atassutillu napparteqqinniarnissaani Venstremut, tassa Atassutip Danmarkimi parteeqataanut, isumassarsiornissaq pisariaqartoq ilaatigut aamma oqarluni.

Gerhardt Petersenillu ilanngullugu oqaatigaa Nunarput Danmarkilu imminnut atajuarumaartut.

- Naalakkersuinikkut aqutsinerit inatsisillu tunngaviusut atortinneqarneranut tunngasut qanoq ikkaluarpataluunniit, Kalaallit Nunaat Danmarkilu ataatsimoorfeqarlunilu ikinngutigiittut ingerlajuassaaq. Ukiorpassuarnimi Danmarkip Kalaallit Nunaatalu ingerlaqatigiissimanerisa kingunerisaanik ima sakkortutigisumik ilaqutariittut ikinngutigiittullu inissisimalersimavugut, allaat taakkua kipitinneqarsinnaanatik.

Gerhardt Petersenip oqalugiarnermini ilaatigut uranitalinnut piiaanngilluinnarnissamut isummersimaneq, nunatsinni inuit najugaqariaasiat, nunatsinni aningaasarliorneq kiisalu uuliamut pisuussutinillu allanut piiaanerit eqqaavai.