GE: Pissaanillit naammanngitsumik iliornerat unittoortitsivoq

Aningaasaqarnermut Siunnersuisoqatigiit nalunaarusiaanni inerniliussat politikerinit ilumoorunneqartariaqartut, Sulisitsisut pisortaat aamma isumaqarpoq.

- Maanna iliuuseqartariaqarpugut, aaqqissuusseqqinnissallu kinguarteqattaaraluaraanni iluaqutaanngilaq. Taamaaaliunngikkuttami meerartavut akiitsoqarpallaalissapput, Brian Buus Pedersen oqarpoq.

- Politikerit nukingerluinnaqqissaartariaqartut isumaqarpugut. Politikeritta amigartunik iliuuseqarnerat meerartatta akilertussanngorsinnaavaat. Ajornartorsiutit uagut aaqqissinnaanngisagut meerartatta inuusuttattalu suliassarilertussaavaat, tamannalu pissusissamisuunngilaq, Brian Buus Pedersen oqarpoq.

Aamma atuaruk Aningaasaqarnermut siunnersuisoqatigiit aningaasanut inatsimmut siunnersuut isornartorsiorpaat

Aappaagumut aningaasanut inatsisissatut Naalakkersuisut siunnersuutaanni 100 millionit koruunit missaannik amigartooruteqarnissaq, Aningaasaqarnermut Siunnersuisoqatigiit isornartorsiuinerat, taassuma isumaqatigaa:

- Pisortat aningaasaateqarfiini ajornartorsiorneq annertooq aaqqinniarlugu iliuuserineqartut annikippallaarput, sulisitsisut peqatigiiffianni pisortaq oqarpoq.

Nunarput aningaasarsiornissamut periarfissaqarluartoq taassuma tikkuarpaa, pissaanillilliukua sapiissusikinerisa ineriartornissaq unikaallatsikkaa, Brian Buus Pedersen oqarpoq.

- Taamaakkaluartoq Aningaasaqarnermut Siunnersuisoqatigiit nalunaarusiaanni isumalluarnartunik GE erseqqissaateqarput. Nunatsinni pisuussutinik annertuunik peqarpoq taakkualu aallartinneqarnissaannut periarfissaqarput. Aalajangiinissanullu pingaaruteqartunut piumassuseqarnerput pisariaqarpoq.

Soorluuna avaqqutaariuaannartugut politikkikkullu piumassuseqarneq amigaataasartoq, Sulisitsisut Peqatigiiffianni  GE-mi pisortaq Brian Buus Pedersen oqarpoq.