Aningaasaqarnermut siunnersuisoqatigiit aningaasanut inatsimmut siunnersuut isornartorsiorpaat

Kalaallit Nunaanni aningaasaqarnermut siunnersuisoqatigiit siulersuisuisa Nunatta aningaasaqarnera pillugu ukiumoortumik nalunaarusiartik maannakkorpiaq saqqummiuppaat.

Naallu aningaasaqarneq pillugu immikkut ilisimasallit nalunaarusiaminni erseqqissumik oqaasertalinngikkaluaraat oqaatigerusutaat paatsuugassaanngilaq.

Suliffissaaleqisorpassuit politikerit iluamik iliuuseqarfiginngilaat, akitsuusersuinerit ajornartorsiutit aaqqinnavianngilaat, iluarsaasseqqinnissamullu pilersaarutit aningaasatigut naammattumik isertitsissutaanaviaratik.

Aamma atuaruk Steen Lyngep akitsuutit qaffannagit akileraarutit qaffakkusuppai

Aarlerisaarutigaattaaq sinneqartooruteqarnissamut neriuuteqarani ukiuni arlaqalersuni amigartooruteqarluni ingerlaneq.

Politikerit ukiuni arlaqalersuni iluarsaasseqqinnissat neriorsuutigisimavaat, tamatumalu nunap aningaasaqarnerata siunissami isumannaannerulernissaa qulakkiissagaa.

Ukiuunerani ataatsimiinnermi politikerit soraarnerussutisiat siusinaarlunilu sulisinnaajunnaarnersiutit pillugit iluarsaasseqqinnissaq kiisami oqallisigilissavaat. Ineriartornermut peqataassapput, utoqqalisartummi amerliartortillugit aningaasartuutit isertitallu ataqatigiikkunnaassammata.

Aamma atuaruk Kingusinaartumik mianersoqqusineq IA-p isornartorsiorpaa

Kalaallit Nunaanni aningaasaqarnermut siunnersuisoqatigiilli Naalakkersuisut iluarsaasseqqinnissamut siunnersuutaat uissuumminartoqartinngilaat.

Tamanna pillugu allapput siunissaq ungasinnerusoq isigalugu aningaasaqarnermi ajornartorsiutaasussanik aaqqiissutissaqanngitsoq.

Akitsuusersuinissat assorsuaq isoriniarneqarput. Aningaasaqarneq pillugu ilisimasallit allapput, ajornartorsiutinik aaqqiinissamut iluaqutaanavianngitsut.

Aamma atuaruk Uldum Nunatta karsiani nuannaajallarnartunik takunissamik kissaateqarpoq

Tamatuma saniatigut aningaasaqarneq pillugu ilisimasallit sulinerup imminut akilerluarsinnaanissaanik aalajangikkanik amigaateqarput.

Ataatsimoorlutik uparuarpaat politikerit neriorsuutigiuarsimagaat, iluarsaasseqqinnerit aningaasaqarnermut inatsit sinneqartoortikkumaaraat. Sinneqartooruteqarnissaq taanna kinguartiterneqartuarsimavoq. Maannalu aamma sinneqartoornissaq 2019-imut kinguartinneqarpoq. Kalaallit Nunaanni aningaasaqarnermut siunnersuisoqatigiit ersarissumik oqarput, tamatumuuna sinneqartooruteqarnissaq eqquutsinneqartariaqassasoq.