Gazami peqqinnissamik suliaqartut toqungasut timaannik 200-nik napparsimmavimmi nassaartut
![](/sites/default/files/styles/image_934x467/public/2024-04/20240325-135228-6-1920x1279we.jpg?itok=UlZ2Yo8-)
Inuit toqungasut timaat 200-t Gazap kujasissuani Khan Younisimi napparsimmavimmi ulluni kingullerni pingasuni nassaarineqartut Gazap innuttaasut illersornissaannik suliaqarfiata ataasinngornermi paasissutissiissutigaa.
Inuit toqunneqarsimasut israelimiut sakkutuuinit iliveqarsimassangatinneqarput.
Nutaarsiassaqartitsivik AFP taama allaaserisaqarpoq.
Gazami peqqinnissamut oqartussat Hamasimit aqunneqartut Gazami oktobarip aallartinnerani sorsuttoqarneraniilli inuit 34.100-t missaanniittut toqutaasimasut oqaatigaat.
Israelimiut sakkutuui toqungasut timaasa 200-t nassaarineqarneranik nalunaarfigineqarput. AFP-mullu ima akissuteqarput:
- Suliamut uunga atatillugu uterfigeqqikkumaarpassi.
Innuttaasut illersornissaannik suliaqarfimmi oqaaseqartartup, Mahmud Bassalip toqungasut timaannik napparsimmavimmi al-Nasserimi suli nassaallattaasoqartoq paasissutissiissutigaa.
Toqutaasimasut ilaat naalliutsinneqarsimassangatinneqartut taassuma sapaatiummat paasissutissiissutigaa.
Assaasoqaannassasoq
Toqungasut ilaasa timaat uninnganngaatsiarsimapput. Taamaammat nassaarineqartut kinaassusersiniarnerat ajornakusoorpoq.
Hamasip tusagassiisarfiani atorfilittap, Ismail al-Thawabtap toqungasut 283-it napparsimmavimmi nassaarineqarsimasut paasissutissiissutigaa.
- Inuppassuit naalagaaffimmit tiguaasumit (Israelimit aaqq.) toqunneqarsimasut iliverpassui Napparsimmavimmi al-Nasserimi nassaaraagut, al-Thawabta oqarpoq.
Gazap illersornissamut suliaqarfiani atorfilittap allap, Muhammad al-Mughayyirip toqungasut timaannik napparsimmavimmi nassaarneq aamma uppernarsarpaa, sinnerinillu sisamanngornerup tungaanut ujaasisoqaannarnissaa oqaatigalugu.
Israelimit sakkutuuisa nakuusernerat pillugu napparsimmavimmi marsimi nalunaaruteqartoqarpoq.
Israelimiut sakkutuuisa napparsimmavimmik februaarip qiteqqunnerani tiguaanerisa kingornatigut napparsimmavimmi al-Nasserimi nakorsat israelimiut sakkutuuinit annersarneqarlutillu assigiinngitsutigut nikassaasumik iliuuseqarfigineqarsimapput.
Tamanna napparsimmavimmi atorfeqartut arlallit tuluit tusagassiorfiannut BBC-mut oqaluttuaraat.
Israelimiut sakkutuuisa tigusarinninnerminni peqqarniisaarniartumik pasisaqaraangamik amerlanertigut taakku atisaasa qaartartunik sakkunilluunniit allanik misissuiffigineqarnissaat pissutigalugu atisaajartarlugit BBC-mut paasissutissiisutigaat.