Nalunaarusiaq: Gassit silaannarmik kissakkiartortitsisartut aatsaat taama annertutigilersut
![](/sites/default/files/styles/image_934x467/public/article_images/drivhusgasser_chris_861_flickr.jpg?itok=WqSjZgw1)
Silap pissusiata allanngoriartornerata akiorniarneqarnissaa ajornakusuuleraluttuinnassasoq, WMO-p nalunaarusiaani mianersoqqussutigineqarpoq.
- CO2-mik 2017-imi aniatitsinerup annertussusaa, ukiut qulit kingulliit ingerlanerannisut annertutigaaq, WMO taama oqarpoq.
- CO2-mik aniatitsinerit annikillisarneqanngippata, silap pissusiata allanngoriartornera kinguneqarnerlunnerujartuinnassaaq, nunarsuarmioqatigiinnullu aaqqiiviginiarneqarnissaat ajornakusoorneruleriartussaaq, WMO-p qullersaa Petteri Salas oqarpoq.
Kisitsisit nutaat, silap pissusia pillugu Polenimi Katowicemi qaammatip tulliani ataatsimeersuartoqarnissaa sioqqullugu saqqummiunneqarput. Nunarsuarmi nunat assigiinngitsorpassuit ministerii Katowicemi ataatsimeersuariassapput.
Silap pissusiata allanngoriartornera assigiinngitsutigut maanna malugineqarsinnaalereerppoq, panernersuaqartarnerit akulikilligaluttuinnarlutik, kiannerusalerluni, pinngortitami ikuallannerit, qarsutsinerit anorersuarujussuartarnerillu akulikilligaluttuinnarlutik.
Nunarsuulli kiatsikkiartulernera suli unikkaallatsinneqarsinnaavoq. Nukissiuuteqarnerulli, suliffissuaqarnerullu, sanaartornerullu, angallannerullu iluani piaarnerpaamik sukumiisumillu tamanna pillugu iliuuseqartoqartariaqarpoq. WMO nalunaarusiami taama ilaatigut oqarpoq.
ritzau/Reuters