Nuummi aqqusinerni assiliineq
Suliniut Google Streetview assigalugu nunarsuarmi ornitassat sumiikkaluartulluunniit assilisanik assitalerlugit aaqqissuussaavoq - assigiinngissutituaralugu kikkukkulluunniit assilisatik Mapillarymut nutaamut ikkussuussinnaammatigik.
Kommuneqarfik Sermersuumi Sanarfinermut Avatangiisinullu Ingerlatsivimmeersut billerlutik assiliissummik GoPromik siulliulluni aallartissimavoq Nuummilu teqeqquusinnaasut tamangajaasa angalaarfigisimallugit.
Maannalu qarasaasiakkut aaqqissuussamut nutaamut, Mapillaryimut, kikkulluunniit assinik ikkussuinissamut periarfissaqalerput, kommunimiillu tamanut kaammattuutigineqarpoq assilisanik ikkussueqqullugit, taamaaliornikkut Nuuk, kommunillu sinnera, alutornartumik nutaaliaasumillu nunarsuarmioqatigiinnut nittarsaanneqarniassammat.
- Suliniutit Kommuneqarfik Sermersuumi kikkunnulluunniit arlaatigut iluaqutaasinnaasut arajutsinaveersaartarpavut – uagut maani najugaqartugut immitsinnut eqqarsaatigaluta aammali maani tikeraartuvut imaluunniit tikeraarnissaminnik pilersaartut, Sanarfinermut Avatangiisinullu Ingerlatsivimmi pisortaq Mike Jakob Kristiansen oqarpoq.
Nuuk qarasaasiakkoortumik pisuttuarfigiuk
- Tassunga atatillugu Mapillary suliniutaavoq pissanganarluinnartoq. Ilaatigut pissutigalugu kommunitsinni illoqarfiit aamma pinngortitaq pillugu inuit paasiniaanissaminnut pitsammik sakkussarsisinneqassapput, kisianni aamma takornariarumaartussat kusanartunik tamakkiinerusunillu assinik toqqaannartumik ”aallakaatinneqartunik” takusassaqartinneqassapput, angalanissaminnik inniminniinnginnerminni, pisortaq oqarpoq.
Mapillarymi pissutsit maannakkutut itsillugit, Københavnimi, Moskvami New Yorkimi allamiluunniit issialluni Nuup annerpaartaa angalaarfigineqarsinnaavoq.
- Illit innuttaasutut suliniut crowdsourcing nuannersoq pitsaasorlu peqataaffigerusukkukku taamaallaat app aassavat, aneeraangavillu assit ingerlaarterujoorlugit. Kommuneqarfik Sermersooq taama kajumissaaruteqarpoq.
