GA & SIK: Isumaqatigiissut pingaarneq isumaqatiginninniutigeqqittariaqarpoq
- Isumaqatigiissuteqarneq GA-p SIK-llu akornanni pissutsit pitsaanerulersimanerannut erseqqissaataavoq, kattuffeqarfiit marluk ataatsimoorlutik oqaaseqaatiminni taama allapput.
Akissarsiat pillugit upernaaru isumaqatigiinniarnissat tungaannut pitsaanerusumik suleqatigiinnissaq qulakkeerniarlugu Nuummi eqqartuussivimmi ataatsimiinnermi isumaqatigiissuteqarnissaq isumaqatigiissutigineqarpoq, taassumalu ilaatigut isumaqatigiissutip pingaarnerup ukiunik 15-inik pisoqaassusillip isumaqatiginniutigeqqinnissaa malinnaasinneqalernissaalu kinguneralugu, taamaalilluni taanna Kalaallit Nunaannut Namminersulersimasumut nutaaliaasumillu sulisoqarfiusumut piumasaqaatinut naapertuuttunngorsarneqassammat.
- Nuannaarutigaarput eqqartuussivimmi suliassamut ilungersunartumut nukinnik atueqqissannginnatta, allanik unammilligassaqarpugut nukitsinnik atorluaaffiginerusinnaasatsinnik. Maanna siumut isigilissaagut, SIK-p siulittaasua Jess G. Berthelsen GA-llu pisortaa Henrik Leth isumaqatigiissuteqareerlutik assigiimmik oqarput.
