GA: Nukissiuutinik sipaarnerulernissaq aqqutissiuunneqalerpoq

Kiassaatinik uuliatortunik ukiumoortumik misissuisarnerit, paasititsiniaanerit nukissiuuteqarnermullu siunnersortit. Nukinnik pitsaanerpaamik atuinissarput pillugu Sulisitsisut Peqatigiiffiata kingullermik isumasioqatigiisitsinerata kinguneraa, nukissiuutinik sipaarnerunissarput qulakkeerniarlugu oqaaseqaatiliortoqarmat.
novembarip 26-at 2009 13:47

Nukissiuuteqarneq pillugu siunnersorteqalernissaa seminareqarnermi peqataasunit kissaatigineqartunut annernut ilaavoq, siunnersortit taakku nukinnik qanoq ililluta atuinikinnerulersinnaanersugut paasititsiniaasassagaluarput, soqutiginnissinnaasunillu Sulisitsisut Peqatigiiffiat maanna ujartuivoq.

Suliffeqarfinni assigisaannilu nukinnik qanoq atuitigisoqartigineranut atortumik uuttuutaasinnaasumik Namminersorlutik Oqartussat seminareqarnermi saqqummiussipput.

Atortoq taanna Sulisitsisut Peqatigiiffiata allaffeqarfianukaanneqarpoq, innaallagissamik, imermik kiassarnermillu allaffeqarfiup atuinera ukiumi aggersumi annikillisarniarsariniarlugu.

Seminarertoqarnerani eqimattakkuutaanik assigiinngitsunik isumasioqatigiittoqarpoq, kissarsuutit aamma uuliatankit pillugit inatsisissanik pisariaqartitsisoqartoq ilaatigut isumaqatigiissutigineqarluni. Ikummatissanik atuineq annikillisarniarlugu ilinniartitaaneq, ilinniartitseqqiinerit aamma tapiissuteqarnermut periarfissanik pilersitsineq ilaatigut aqqutissaapput.

Sanaartornermik suliaqartut, siunnersortit aamma atorfillit 70-it missaat Nukissiorfiit aamma Sulisitsisut Peqatigiiffiata oktobarimi aaqqissussineranni peqataapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq