GA: Avaleraasartoorniarneq aallartinnaniluunniit taamaatissinnaavoq
- Imartatta avaleraasarpassuaqarnera, Kalaallit Nunaata uppernarsisinnaaguniuk pingaarnerpaavoq, taamalu nunat allat sineriallit Kalaallit Nunaata aamma aalisarsinnaatitaanissaanik akuersisariaqalersillugit, siunissamilu EU, Norge, Savalimmiut Islandilu nungusaataanngitsumik aalisarnissamut isumaqatigiissuteqarsinnaalersillugit.
Tamatumunnga peqatigitillugu Sulisitsisut Peqatigiiffiata Naalakkersuisut sakkortuumik isornartorsiorpai, akitsuutip qaffanneqaqqinnissaanik, tassa kiilumut 1 koruuni 50 øremik akitsuusiinissamik siullermik siunnersuutigineqartoq uterfigeqqimmassuk, tassa aalisariutip suminngaanneernera apeqqutaatinnagu.
Taama akitsuusiisoqassappat, avaleraasartoorniarneq aallartinnaniluunniit unittussaavoq, taamami akitsuusiisoqarneratigut avaleraasartoorniarneq iluanaarutaasinnaanavianngimmat. Tamatumalu peqatigisaanik siunissaq isigalugu Kalaallit Nunaat avaleraasartuunik aalisarfittut taaneqarsinnaajunnaassammat.
- Politikeritta piffissaq qanittoq kisiat isigalugu akitsuusersuiniarnermikkut, Nunatsinni suliffissanik ataavartunik pilersitsivissaq unitsissappassuk - taamatullu aalisarnermik inuussutissarsiutillit aarlerisaarutaat tusaajumassanngikkaat takorlooruminaatsipparput. Taamami pisoqassappat Savalimmiut, Norgep EU-llu nunani tamalaani pisinnaatitaaffiit malillugit Nunatsinni aalisarniaraluarnitsinnik killilersuiniarnerat iluatsissaaq, Sulisitsisut Peqatigiiffiat erseqqissaavoq.
