Pisortaasimasup Wæver akiliilluni peqquserlutsitsisimanerarpaa
Kommune Kujallermi isumaginninnermi pisortaasimasoq Mikkel Balle, AG-mi ullumi saqqummersumi borgmester Jørgen Wæver Johansen aamma kommunaldirektør Frank Hedegaard Jørgensen soraarsitsisimasutut pisuutippai, eqqunngitsumik naatsorsuusioqqummanni itigartissimagamigit.
Borgmesteri kommunaldirektørilu unnerluutiginnissutit eqqunnginnerarpaat, borgmesteri oqarluni taamaattoqarsimanngitsoq, soorlu aamma kommunaldirektøri oqartoq takorluuinerarlugu.
Akiliilluni peqquserlutsitsisimanerarneqarpoq
Isumaginninnermi pisortaq soraarsitaasimasoq Mikkel Balle nassuiaavoq kommunaldirektørip angerlarsimaffimminut pulaarsimagaani, allaffissornerit avaqqullugit 100.000 koruuninik qaffassinnaasoq, qaffasinnerusumillu atorfinilluni, suliffeqarfik Narsamittoq amigaatigineqartumik naatsorsuusiussinnaaguniuk, Jørgen Wæver Johansenimi tassani ajornartorsiuteqalersimammat. Mikkel Balle AG-mut naliliivoq suliffeqarfik pineqartoq tassaasimassasoq Nanoq Beer.
Mikkel Balle oqaluttuarpoq itigartissimallugit. Qaammat ataaseq qaangiuttoq soraarsitaavoq.
Kusanaatsuliorsimasutut soraarsitaasoq
Kommunaldirektørip AG-mut aalajangiusimavaa taamaattoqanngitsoq, Mikkel Ballellu soraarsitaanera sulisoqarnermut tunngassuteqartoq, kommunimmi Ballep pissusilersornera borgmesterimut kommunillu direktørianut kusanaatsuliornertut paasisimammagu.
Politiit AG-mut uppernarsarpaa suliaq misissorneqartoq, maannali oqaaseqarfigisinnaanagu.
