Futsal: Young Guns nakernertik kultinnassutigaat
Young Guns Nuummeersut U-18-it GM-rneranni pissartanngorput nunaqqatitik GSS sapaammi unnukkut ajugaaffigalugit.
1. Young Guns Futsal, Nuuk
2. GSS, Nuuk
3. Nagdlúnguak, Ilulissat
4. S-68, Sisimiut
5. T-41, Aasiaat
6. I-69, Ilulissat
7. B-67, Nuuk
8. Disko 76, Qeqertarsuaq
9. Siuteroq 43, Nanortalik
10. N-85, Narsaq
Akiuulluarnerpaaq:
Addy Frederiksen, I-69
Arsalerillammak isertitsinerpaarlu:
Otto Fleischer, S-68
Piukkunnaateqarnerpaaq:
Milo L. Pedersen, B-67
Arsallammak:
Niklas Kleist, Young Guns Futsal
Iligiit taakku marluk ajorsartinneqaratik finale anguaat. Finalep aallartisimalernerani GSS malinnaalluaraluarpoq arlaleriarlutillu isertitsingajattarlutik.
Unammineq ingerlatillugu Young Guns aqutsinerulerput finalelu naammassimmat 6-2-mik ajugaallutik sulilu amerlanernik isertitsinissamut periarfissaqartaraluarlutik.
Young Guns-ni sungiusaasoq David Janussen naliliivoq sungiusarnissamut piumassuseq angusarissaarnermut aqqutaasoq.
- Young Guns aallarneratsigu arsaattartullu isumaqatigiippugut sungiusarnernut tamatigut takkuttoqartassasoq, David Janussen oqarpoq.
U-18-it futsalimi GM-rneranni iligiit ataatsit amerlanerpaamik 15-nik arsaattoqarsinnaapput. Arsartut sungiusarnermik pimoorussinnginngitsut piffissap ingerlanerani peerneqartarput.
- Nuummi peqatigiiffiit allat eqqornissaat soqutigisarinngilarput illuanilli Nuummi futsalip siuarsarnissaa soqutigisaralugu, David Janussen oqarpoq.
Young Gunsini aquttoq Niklas Kleist arsallammattut toqqarneqarpoq aammalu ukiup iligiivinut toqqagaasunut ilaalluni.
Bronzennanniunnermi Nagdlúnguak Ilulissaneersoq S-68-mut Sisimiuneersumut ajugaavoq.
